Foto: aqmolanews.kz
Esil ózeni tasyp, aýylǵa tartylǵan elektr jelisiniń baǵanalary qulap, aýylǵa baratyn joldy da sý shaıyp ketken edi. Alaıda aýyl halqy azyq-túlikten, aýyzsýdan, dári-dármekten zárýshilik kórgen emes. Keshe osy Úshqarasý aýylyna taǵy da qaıyq keldi. Sol qaıyqpen aýyzsý, azyq-túlik, esepte turǵan túrli syrqattarǵa, balalarǵa qajetti dári-dármek, tipti zeınetkerlerdiń zeınetaqylary da osy qaıyqpen jetkizildi. Qaıyqshy qutqarýshylar erteń de kelemiz dep ketti.
Jalpy, bul aýyl jalǵyz bıyl ǵana sý jolynda qalyp otyrǵan joq. Qar qalyń túsken jyldary sý jolynda qalyp qoıatyny bar. Bıyl da solaı boldy. Qardyń qalyń túskendiginen Úshqarasý aýylynyń irgesinen ótetin Esil arnasynan shyǵyp, aýylǵa qatynaıtyn joldyń bir bóligin alyp ketti. Elektr jelileri de qulady. Osy sebepti aýylǵa jol qatynasy bolmaı qaldy. Qaýipsizdik úshin elektr qýatyn aǵytyp tastaýǵa týra keldi. Oblys ákimi Marat Ahmetjanov sýdyń beti qaıtysymen birden joldy jáne qulaǵan elektr baǵanalaryn qalpyna keltirýdi tapsyrdy jáne osy máseleni kún saıyn óz baqylaýyna aldy.
Qazir sýdyń beti qaıta bastady. Jaǵdaı qalypqa keler kún de alys emes, Úshqarasý aýylynyń turǵyndary azyq-túliksiz, aýyzsýsyz qalyp otyr degen aqparat ta tarap ketti.
Aýyl ákimi Arystanbekovtiń aıtýynsha birde-bir aýyl turǵyny osy kúnge deıin «nanymyz joq, sýymyz joq» dep shaǵym aıtpaǵandyǵyn alǵa tartady. Bul áńgimeni qozdyryp júrgender Úshqarasýda saýda dúkenderiniń ıeleri eken. Olar joldyń ýaqytsha joqtyǵynan ózderiniń saýda oryndarynyń sóreleri azyq-túlikten bos qalǵan soń, aýyl halqynyń dastarqany da bos qalǵandaı sezingenderi anyq. Alaıda aýyldyń aty aýyl emes pe? Ár úıdiń qoryndaǵy jan azyǵy men qorasyndaǵy mal azyǵy ázirge túgesilgen emes.
Úshqarasýǵa kerek deıtin azyq-túlik, aýyzsý, dári-dármek alyp qaıyq keldi. Ol qaıyq jaǵdaı qalypqa kelgenshe qatynap turatyn bolady. Buryn-sońdy bolmaǵan qyzyl sý júrgeli qarap jatqan jan balasy qalǵan joq dese de bolǵandaı.
Tabıǵattyń osy bir synǵa salǵan sátinde el bolyp, zardap shekkenderge Aqmola oblysy boıynsha qoldaý da, kómek te kórsetilip jatyr. Shyqqan shyǵyndar ótele bastady. Qaraótkel men Kókshetaýdyń ózen-kólderi arnasyna tola bastaǵandaı. Halyqtyń senimi de, kóńil-kúıleri de sabyrdyń arnasynda.
Jabal Erǵalıev,
jazýshy
Aqmola oblysy
