Bıylǵy kóktem el-jurtty ábigerge salyp-aq tur. Jer-jerlerde aldyn alý jumystaryn aqpan aıynda bastaǵanymen, tilsiz jaýdyń qashan, qaıdan lap qoıaryn eshkim dóp basyp aıta almaǵan. Tabıǵattyń tosyn minezin boljaý da ońaı emes.
12 sáýirde Marqakól óńirinde toqtaýsyz jaýǵan jańbyr men erigen qar sýynyń saldarynan bolsa kerek, topyraq kóshkini júrip, kúre jol opyrylyp túsken. Jolaýshylardyń qaýipsizdigi úshin Terekti – Uranhaı – Tósqaıyń oblystyq mańyzy bar joldyń 13 shaqyrymy, ıaǵnı Mármár asýynda jol jabylyp, oıylǵan tusty qaıta qalpyna keltirý jumystary dereý bastalǵan. Bul úshin polısııa qyzmetkerleri kezekshilik uıymdastyryp, aýyr tehnıkalar 20 metrdeı tereń shuńqyrdy toltyrýmen aınalysa bastaǵan. Áýelde jergilikti bılik oıylyp túsken jer bir-eki kúnniń sharýasy emes degen. Abyroı bolǵanda, kóptep kómektep júrip eki-úsh kún ishinde joldy qaıta qalpyna keltirdi.
«Oblystyq mańyzy bar joldyń boıynda taý jynystary opyrylyp qulap ketti. Neshe kún jaýǵan jańbyr men erigen qardyń sýy topyraq tósemin aǵyzyp áketken. Jol jabyldy. Tıisti mamandardan komıssııa qurylyp, oqıǵa ornyna jettik. Zerttep, jumysty bastadyq. Tehnıkalardyń kúshimen, mamandardyń biliktiligimen jol tez arada jóndeldi. Aıta keteıik, bul tusta jolasty qubyry bolmaǵan», dedi oblystyq jolaýshylar kóligi jáne avtomobıl joldary basqarmasynyń basshysy Nurjan Jumadilov.
Úsh-tórt kúnge jol jabylǵanymen, jedel járdem men azyq-túlik tasymaldaıtyn kólikter úshin aınalma jol qarastyrylǵan. Al aýdan halqy túsinistik tanytyp, jolǵa shyqpaǵan.
Bul kúni ózennen kóterilgen sý Boran aýlyna da jaıylǵan. Aýdan ákimdigi mamandarynyń málimetinshe, jumyldyrylǵan kúsh tilsiz jaýdyń betin birden qaıtarǵan. Bul úshin Boran – Zaısan baǵytyndaǵy kúre joldan sý ótkeli qazylyp, qatynas toqtaǵan. Osy ýaqytta shyǵarmashylyq jumyspen Zaısanǵa barǵan Boran mektebiniń muǵalimderi men oqýshylary úılerine qaıtyp, aýylǵa kirýge múmkindik bolmaǵan. Ony estigen Zaısan aýdany ákimdigi ınternat-úıden oryn berip, yńǵaıly jaǵdaı jasaǵan. Al Boran aýlyndaǵy jaǵdaı – erekshe baqylaýda.
Dál sol kúni Kúrshim aýdanyndaǵy Qalǵuty ózeniniń sýy arnasynan shyǵyp, qaýip tóndirgen. Kúrshim aýdanynyń ákimdigi habarlaǵandaı, sý basýdyń aldyn alý úshin oblystyq mańyzy bar Kúrshim – Aqsýat jolynyń 23 shaqyrymynda jınalǵan sýdy ótkizýge arnalǵan arna salyndy. Jol Amanat, Jolnusqaý jáne Aqsýat eldi mekenderin jalǵaıdy. Atalǵan eldi mekenderde uzyn sany 705 adam turady. Qazir olar aýyldaryna aınalma jolmen qatynap júr. Joldy qalpyna keltirý úshin qajetti materıaldar daıyndalyp, opyrylǵan jerge jetkizilip jatyr. Al jol sý deńgeıi tómendegennen keıin ǵana jóndeledi.
Sonymen qatar Altaı aýdanyna qarasty birqatar aýylǵa da qarǵyn sý qaýip tóndirgen. Abyroı bolǵanda, úıdi-úıge jaıylyp, turǵyndardyń tynyshyn ala qoıǵan joq. Mamandar kún-tún demesten ózen boıyndaǵy aýyldardy jiti baqylap júr. Oblys basshylyǵy da sý basý qaýpi bar degen aýyldardy óz kózimen kórip qaıtqan.
Altaı taý silemderiniń qary sáýirdiń sońyna qaraı erı bastaıtynyn eskersek, arqany keńge salýǵa tym erte. Taýdyń tentek ózenderi arnalarynan asyp tasysa, birqatar aýylǵa qaýip tóndirmeı qoımaıdy. Sol úshin daıyndyq jumystary pysyqtalyp turýy kerek-aq.
Shyǵys Qazaqstan oblysy
