Elge qyzmet etemiz

Táýelsizdik – qaı halyq úshin de kıeli, qasterli uǵym. Ol halqymyzǵa ońaılyqpen kelgen joq.  Táýelsizdiktiń jolynda ata-babanyń qany, analarymyz ben aq jaýlyqty ájelerimizdiń kóz jasy tógildi.  Áz Táýelsizdik haqynda Tuńǵysh Prezıdentimiz Nursultan Nazarbaevtyń «Qazaq halqy san ǵasyrlar boıy óziniń egemendigi men táýelsizdigi úshin kúresip keldi. О́ziniń eń jaqsy qasıetteriniń: qater tóngen sátte birigip, uıymdasa bilýiniń, sondaı-aq, basqa halyqtarmen beıbitshilik,  kelisim men tatý kórshilik jaǵdaıynda turýǵa degen ynta-yqylasynyń arqasynda ol tarıh tasqynynyń astynda qalyp qoımaı, óziniń memlekettiligin qalpyna keltire aldy»,  degeni oıǵa oralady. Búginde Qazaqstan memleketi táýelsizdik tamyryn tereńge salyp, uly kóshke ilesti. Osy eldiń azamattary retinde el táýelsizdigin baıandy etýge, Otanymyzdyń qýatyn arttyrýǵa, onyń ıgiligine, halyqaralyq qoǵamdastyqtaǵy bedeliniń óse túsýine qyzmet etýge mindettimiz. Qurylǵanyna 60 jyl tolǵan «Jaıyqgıd­ro­geologııa» kásiporny táýelsizdiktiń alǵashqy jyldaryndaǵy barlyq qıynshylyqtardy elmen birge bastan ótkerdi. Táýelsizdikpen birge tynysymyz ashylyp, tirlimizge ár kirdi. Bıyl kompanııamyz oblystyń 24 aýylyn aýyzsýmen qamtamasyz etý maqsatynda barlaý  jumystaryn júrgizip, úkimettik komıssııanyń qaraýymen jer­asty sý kenderiniń shamasyn  bekitti. Sonyń ishinde Aqjaıyq aýdanynda Bazartóbe, Shabdarjap, Bórli aýdanynda Aqbulaq, Jańaqala aýdanynda Aıtpaı,  Jánibek aýdanynda Jasqaırat, Talovka, Zelenov aýdanynda Balaǵan, Makarov, Mahambet, Qaratóbe aýdanynda Sonaly, Daıynótkel, Syrym aýdanynda Bulan, Qosoba, Araltóbe, Buldyrty, Jambyl, Tasqala aýdanynda Amankeldi, Mereı, Terekti aýdanynda Poıma, Novopavlovka, Podstepnyı, Aqsýat, Aqjaıyq, Prırechnyı aýyldaryna táýligine 5 200 tekshe metr mólsherinde aýyzsý qory  anyqtalyp, bekitildi. Aýyzsýǵa muqtaj bolyp otyrǵan Aqsaı qalasyna jáne Jympıtynyń aınalasyndaǵy aýyldarǵa Aqbulaq jáne Keńashy jerasty sý kenderi barlanyp, sý qorynyń mólsheri anyqtaldy. Sonyń ishinde kópten beri tushy sý kútip júrgen Syrym aýdanynyń aýyldaryna toptyq sý qubyryn jobalaýǵa múmkinshilikter paıda boldy. Jergilikti qurylys ındýstrııasyn shıkizatpen jabdyqtaý maqsatynda jalpy keń taraǵan paıdaly qazbalar barlanyp, olardyń óndirisin júrgizýge jobalar bekitildi. Mysaly, Oral qalasynyń qasyndaǵy Belaıa gorka atty aq balshyq, kórshiles Atyraý oblysynyń Inder aýylyna shektesetin tustan juqa qıyrshyqty qum jáne gıps, Darııan aýyly qasyndaǵy qum kenderi óndiris júrgizýge ázirlendi. Aýyzsý máselesi sheshilmegen aýyldar oblys­ta áli de barshylyq. Sondyqtan, aýyldardy aýyz­sýmen qamtamasyz etý baǵytyndaǵy jumystar «Aqbulaq» baǵdarlamasy boıynsha jalǵasady dep oılaımyz. Bar maqsatymyz, elimizdiń kórkeıýi úshin jáne halyqtyń ál-aýqatyn arttyrý jolynda qolymyzdan kelgen qyzmetimizdi adal atqarýǵa umtylýdamyz. Bısen DAÝMOV, «Jaıyqgıdrogeologııa» JShS bas dırektory, jer qoınaýynyń qurmetti barlaýshysy.