Zańnyń negizgi maqsaty – áıelder men balalardyń quqyqtary men zańdy múddelerin qorǵaý sharalarynyń tıimdiligin arttyrý. Qazirgi tańda, ókinishke qaraı, qoǵamda otbasyndaǵy zorlyq-zombylyq jáne turmystyq quqyq buzýshylyqtar tolastamaı tur. Onyń ishinde, abıýzerler tarapynan áıelderi men balalaryn asa qatygezdikpen uryp-soǵyp jatqan faktilerdi jıi baıqaımyz.
Qalyptasqan jaǵdaılar óskeleń urpaqtyń psıhıkasyna keri áser etetindigi jáne olardyń damýyn tejeıtindigi sózsiz. Sondyqtan bul máselelerdi ret-retimen sheshý maqsatynda elimizde áleýmettik baǵyttaǵy quqyq buzýshylyqtardy qatańdatý úshin birqatar júıeli shara qabyldanyp jatyr. Ashyp aıtsaq, Ishki ister mınıstrligi qurylymynda áıelderdi zorlyq-zombylyqtan qorǵaý boıynsha arnaıy bólimsheler quryldy. 2021 jyly olardyń shtat sany 256 birlikke deıin ulǵaıtylǵan edi. Mundaı laýazymdar qazir árbir qalalyq jáne aýdandyq polısııa organynda bar. Sondaı-aq áıelder men kámeletke tolmaǵandarǵa qatysty jynystyq zorlyq-zombylyq qylmystaryn tergeý boıynsha áıel tergeýshilerdiń mamandanýy engizildi.
Qabyldanǵan negizgi zańmen 15 zańnamalyq aktisine, onyń ishinde jeti kodeks pen segiz zańǵa ózgerister men tolyqtyrýlar engizý kózdelgen. Zańdarmen kámeletke tolmaǵandardy qorlaý (qorqytý, kıberbýllıng) jáne 16 jasqa tolmaǵan balany qoǵamdyq kólikten májbúrlep túsirý jáne basqa da túzetýler úshin ákimshilik jaýapkershilik belgilenedi. Munyń barlyǵy memlekettik deńgeıinde zań men tártiptiń qatań saqtalý qaǵıdaty dáriptelýine, al qoǵamda qylmysqa múldem tózbeýshilikti ornatýǵa baǵyttalǵan. Bul – quqyqtyq qoǵam qurý jolyndaǵy tegeýrindi qadam.
Bekbol ORYNBASAROV,
Senat depýtaty
