Asa jeńil salmaqta Eldos Smetov pen Nurqanat Serikbaevqa senim artylyp otyr. Eki Olımpıada (1 kúmis, 1 qola) men úsh álem chempıonatynda (1 altyn, 2 qola) jeńis tuǵyryna kóterilip, Azııa oıyndary men qurlyq birinshiliginde bas júldeni oljalaǵan Eldostyń qazirgi qarqyny qýantarlyq emes. Bıyl kúzde 32 jasqa tolǵaly otyrǵan dańqty dzıýdoshy qandaı jarysqa qatyssa da, únemi jeńilis taýyp jatyr. Bul jaǵdaı jankúıerlerdi alańdatyp otyr. Shyny kerek, Smetovke qaraǵanda Serikbaevtyń qarqyny áldeqaıda jaqsy. Taıaýda Tbılısıdegi «Grand Slam» týrnırinde top jarǵannan keıin 21 jastaǵy jerlesimiz álemdik reıtıngte birden alty satyǵa joǵarylady. Qazirgi kezde Nurqanat IJF tiziminde 17-orynda tursa, Eldos 26-oryndy qanaǵat tutyp tur. Bizdiń paıymdaýymyzsha, ulttyq quramanyń bas bapkeri Nurbol Súleımenov joǵaryda esimderi atalǵan qos balýannyń qaısysy myqty ekenin anyqtaý úshin ekeýin de osy alamanǵa qosýdy qup kórdi.
66 kg salmaqtyń serkesi Ǵusman Qyrǵyzbaevtyń óz jankúıerlerin qýanta almaı júrgenine biraz ýaqyt boldy. 2021 jyly álem chempıonatynyń qola júldegeri atanǵan qandasymyzdyń sońǵy qomaqty tabysy – 2022 jylǵy Azııa birinshiliginiń qolasy men byltyr Astanada ótken «Grand Slam» dodasynyń kúmisi. Bul kúnderi ol úzdikter reıtınginde 19-orynǵa turaqtady. Ǵusmanmen birge bul jarysta jastar býynynyń ókili Janarys Ahmetqalı kúresedi.
73 kg salmaq dárejesinde Danııar Shamshaev pen Asqar Narqulov sheberlik baıqasady. Azııa chempıony degen ataǵy bar Danııar IJF reıtınginde 13-orynda tursa, Asqar 65-satyǵa taban tiredi. 81 jáne 100 kg salmaqtarda Abylaıhan Jubanazar men Nurlyhan Sharhan kúsh synasady. Ekeýi de túrli halyqaralyq týrnırlerde ara-tura júlde alyp júr. Búgingi tańda Abylaıhan reıtıngte 16-orynǵa turaqtasa, Nurlyhan odan bir saty tómen tur. Al Erasyl Qajybaev alyptarmen aıqasady. Túıe balýanymyz myqtylar tiziminde 35-satyǵa ornalasty.
Áıelder arasyndaǵy asa jeńil salmaqtyń júldesi úshin Ábıba Ábýjaqynova men Ǵalııa Tyńbaeva talasady. Alǵashqysynyń ataǵy alysqa jaıylǵan. Ábıba dúbirli dodalarda únemi oljaǵa kenelip júr. Keı kezderi Ǵalııa da óreli ónerimen kózge túsip keledi. О́zge salmaq dárejelerinde Baqyt Qusaqbaeva (57 kg), Esmıgúl Kýıýlova (63 kg), Ekaterına Tokareva (70 kg), Margarıta Grısenko men Arýna Jankeldına (78 kg) jáne Kámıla Berliqash pen Aqerke Ramazanova (+78 kg) saıysqa túsedi.
Esterińizge sala keteıik, sońǵy Azııa chempıonaty byltyr tamyz aıynda Astanada ótken edi. Bul jarysta 1 altyn, 2 kúmis jáne 6 qola medal ıelengen otandyq dzıýdoshylar jalpy komandalyq esepte О́zbekstanmen birge úshinshi jáne tórtinshi oryndardy ózara bólisti. Aldymyzda – Japonııa (10+3+0) men Mońǵolııa (2+1+5). Elordada Qazaqstan qurama komandasynyń músheleri arasynda jalǵyz ǵana Danııar Shamshaev daralandy. 73 kg salmaqta beldesken daryndy jas barlyq qarsylasynyń aıaǵyn kókten keltirip, bas júldeni qanjyǵasyna baılady. Fınalda japonııalyq Vakana Kogaǵa ese jibergen Ábıba Ábýjaqynova (48 kg) jáne BAÁ-niń ókili Jafar Kostoevtan jeńilgen Islam Bozbaev (100 kg) kúmispen kúpteldi. Al Maǵjan Shamshadın (60 kg), Ǵusman Qyrǵyzbaev (66 kg), Dıdar Hamza (90 kg), Nurlyhan Sharhan (100) jáne Arýna Jankeldına (78 kg) qola medaldi moıyndaryna ildi. Jerlesterimiz taǵy bir júldeni aralas komandalyq básekede jeńip aldy.
