«Arhıvte kóne basylymdardyń tigindisin qarap otyrǵanmyn. Sol kezdegi Batys Qazaqstan oblystyq «Prıýralskaıa pravda» gazetiniń 1940 jyly 4 qańtardaǵy nómiriniń birinshi betinde qarshadaı qazaq qyzynyń sýreti basylǵan eken. Fotosýrettiń sıpattamasynda «Dosanova H.H.» dep jazylǵanymen, qazaqtan shyqqan qaharman ushqysh qyzdy birden tanydym», deıdi bizben qýanyshty jańalyqty bólisken ólketanýshy Aıbolat Qurymbaev.
«10-synyptyń oqý úzdigi, №1 (Oral) orta mektep boıynsha komsomol komıtetiniń hatshysy H.H.Dosanova Oraldaǵy Osoavıahım janyndaǵy aeroklýbty mektepten qol úzbeı oqyp, «jaqsy» degen baǵamen aıaqtady» dep jazylǵan eken sýrettiń astynda.
Osy gazettiń 1940 jylǵy 6 qańtardaǵy sanynda «Ushqysh qyzdar» degen shaǵyn maqala taǵy jarııalanǵan.
«Jaqynda Oral qalasyndaǵy Qorǵanys, avıasııa jáne hımııalyq ınjenerııany qoldaý qoǵamy janyndaǵy áýe klýbynyń jazǵy mektebinde oqý aıaqtaldy. Kýrsty Boldyreva, Dospanova, Paromova syndy qyzdar jaqsy kórsetkishpen támamdady. Tımofeev, Syganov, Golýbınov, Pısmennyı jáne basqalary synaqtan úzdik ótti. Boldyreva men Paromova nusqaýshy-ushqysh tobyna qabyldandy», delingen maqalada.
Sonymen birge avtor jastardyń áýe isine erekshe qyzyǵýshylyq bildirip otyrǵanyn, bıyl klýbqa kelgen jastardyń jalpy bilim deńgeıi de joǵary ekenin, osy (1940) jyly aeroklýb ushqyshtardan bólek, áýe mehanıkterin de daıarlaı bastaıtynyn habarlaǵan.
Batys Qazaqstan oblysy
