Forýmǵa elimizdiń 14 iri joǵary oqý ornynan, shetel ýnıversıtetteri men ǵylymı uıymdardan jas ǵalymdar kelip, saladaǵy aýqymdy taqyryptarǵa tereń boılady. Túıgen-bilgen izdenisterin ortaǵa saldy. Dál osy kúni jas ǵalymdar men stýdentter arasynda ótken baıqaý jeńimpazdaryn marapattaý saltanaty ótti. Komıssııa quramy 400-den asa ótinish ishinen hırýrgııa jáne sabaqtas pánder, pasıentterdiń qaýipsizdigi, qoǵamdyq densaýlyq saqtaý jáne densaýlyq saqtaýdaǵy jasandy ıntellekt, sáýlelik terapııa, sáýlelik dıagnostıka, ıadrolyq medısına jáne basqa da sala boıynsha júzdegen úzdik ǵylymı baıandamany iriktepti. Forýmda Densaýlyq saqtaý vıse-mınıstri Tımýr Sultanǵazıev «Jas daryn» korporatıvtik baıqaýynyń úsh jeńimpazyn marapattady.
– Saladaǵy jas tolqynnyń zeıinin asha túsetin forým ýnıversıtettiń 60 jyldyǵy aıasynda ótkizilip jatqany zańdy dep sanaımyn. 1964 jyly qurylǵan Astana medısına ýnıversıteti búginde medısınalyq bilim berýdiń barlyq spektrin biriktirip, ǵylymı, áleýmettik jobalaý men ınnovasııa ortalyǵyna aınalyp otyr, – dedi vıse-mınıstr.
Jas ǵalymdardy Ǵylym jáne joǵary bilim mınıstri Saıasat Nurbek te quttyqtap, beıneúndeý joldaǵan.
«Ǵylym – ulttyq ekonomıkanyń qozǵaýshy kúshi. Bul salany halyqaralyq deńgeıde básekege qabiletti etý úshin Prezıdent Qasym-Jomart Toqaev birqatar bastama kóterip, Úkimetke jan-jaqty qoldaý kórsetýdi tapsyrdy. Osylaısha, ǵylymdy damytýǵa bólingen qarajat aldyńǵy úshjyldyq kezeńmen salystyrǵanda 3,3 esege ulǵaıyp, 643 mlrd teńgege jetti. Álbette, ǵylymdy qoldaý munymen toqtap qalmaıdy. Ulttyq jobaǵa sáıkes, 2025 jyly ǵylymdy qarjylandyrý 1%-ǵa, ıaǵnı 1 trln teńgege deıin ulǵaıtý josparlanǵan», dedi mınıstr.
Forýmnyń MedX formatyndaǵy sessııalarynda ǵylym salasynda tanylyp úlgergen 15-ten asa spıker jastarǵa tabysty keıster týraly aıtyp berdi. Izinshe DemoDay aıasynda úzdik startap jobalary tanystyryldy. Ǵylymı jobalardyń tanystyrylymyna 40-tan asa ótinish tússe, olardyń eń úzdikterine arnaıy júlde buıyrǵan. Jeńimpaz jastar óziniń jobasyn iske asyrý úshin qarjylaı qoldaýdan qur qalmaıtynyn aıta ketkenimiz durys bolar.
Forýmnan keıin áıelderdiń densaýlyǵyna baılanysty máseleler «Radıologııadaǵy áıelder densaýlyǵy» halyqaralyq ǵylymı-praktıkalyq konferensııasynda qaraldy. Densaýlyq saqtaý mınıstrliginiń derekterine úńilsek, sút bezi obyry áıelderdegi qaterli isik qurylymynda 1-orynda (13,2%) tur. Orta eseppen alǵanda, jyl saıyn elimizde 5 myńǵa jýyq áıelden osy dert anyqtalady. О́kinishtisi, onyń ishinde 1 200-ge jýyq áıel ómirimen qoshtasady. Demek, keıingi jyldary áıel densaýlyǵyna qatysty tereń zertteýler júrgizilip, izdenisterdiń izimen salaǵa ózgerister engizilýi ábden oryndy. Konferensııada radıologııa salasynda qyzmet etetin 250-den asa otandyq maman bas qosty. Olar áıelderde kezdesetin túrli aýrýlardy dıagnostıkalaý, emdeý, medısınalyq mekemelerdiń tájirıbesine jańashyldyqtar engizý jaıyn qarady.
Astana medısına ýnıversıtetiniń basqarma tóraǵasy Kamaljan Nadyrovtyń aıtýynsha, áıelder densaýlyǵy bizde ǵana emes, álemde mańyzdy medısınalyq-áleýmettik máseleniń biri sanalady. Iаǵnı oqý ornynda rezıdentýra baǵdarlamasy boıynsha 83 rentgenolog dáriger de tekten-ten bilim almaıdy. Ýnıversıtettiń magıstranttary men doktoranttary óz zertteýleriniń baǵyty retinde osy salany jıi tańdaıtyny beker emes.
Konferensııada ýnıversıtet basshysy Kamaljan Nadyrov sheteldik ataqty professor Raıner Rıenmıýllerge Astana medısına ýnıversıtetiniń qurmetti professory ataǵyn tabystasa, professor Raýshan Rahymjanova Qazaqstan radıologııalyq qoǵamynyń qurmetti múshesi ataǵyn Irına Abel men Aleksandr Zýbarevke tapsyrdy.
