Aýdannyń Kapıtonovka, Jýravlevka, Voznesenka, Ivankovka aýyldaryn topan sý basty. Ashyǵyn aıtqanda, támam el abyrjyp qalǵany da ras. Dál osyndaı ýaqytta kórsetilgen janashyrlyqtyń, qanatty qamqorlyqtyń qadiri basym eken. Ile aýdanda gýmanıtarlyq kómek jınaıtyn arnaıy 13 oryn ashyldy. Atam qazaq «qaıǵyny bólisse azaıady» deıtuǵyn. Beınet te solaı eken.
– Biz tasqyn sýdyń saldarynan jerlesterimizdiń qınalyp otyrǵan sátin estigennen keıin qarap otyra almadyq, – deıdi Makınsk qalasynyń turǵyny Nıkolaı Bondarenko, – osyndaıda kómek qolyn sozý naǵyz aǵaıyndyq. Ári-beriden soń azamattyq paryz sanadyq. Budan qıyn kezde de ıyǵymyzǵa túsken júkti birlesip kótergen joqpyz ba? Bul joly da tabıǵattyń tarpań minezin jumyla kóterip, jeńip shyǵarymyz sózsiz.
Bulandylyqtardyń beınetinen qulaqtanǵan ózge aýdandardyń turǵyndary da júrek jylýyn jetkizip jatyr. Taıaýda aýdanǵa jalpy kólemi 17 tonna bolatyn gýmanıtarlyq kómek jetkizildi. Dál qazir qasqaldaqtyń qanyndaı qat bolyp turǵan turmystyq buıymdar men azyq-túlikti Astana, Kókshetaý qalalary men Býrabaı, Birjan sal aýdandarynyń turǵyndary jibergen eken.
– Gýmanıtarlyq kómektiń ishinde kókónis, dári-dármek, sharýashylyq zattary, tipti kómir de bar, – deıdi aýdandyq jumyspen qamtý jáne áleýmettik baǵdarlamalardy úılestirý bóliminiń basshysy Abylaı Jaqypbekov, – dál osyndaı is-qımyl, qamqorlyq túptep kelgende bizdiń kúshimiz birlikte ekenin kórsetip tur.
Jekelegen ujymdar da qol ushyn sozýda. Aýdandaǵy aýrýhanalar men balabaqshalardyń qyzmetkerleri eriktiler retinde el ishindegi shashylǵan zattardy jınastyryp, tártipke keltirýge kirisip ketken. Ýaqytsha qıyndyq óter-keter, al birlikti bekemder berekeli sharýa el esinde qalary anyq.
Aqmola oblysy,
Bulandy aýdany
