Erte kóktemde jerge tóselgen qyzyl kilemdeı gúlderimen kózdiń jaýyn alatyn Aqtoǵaı saıynyń tabıǵatyna tamsanbaıtyndar kemde-kem. Qarataýdyń qyr gúli qulpyrǵan bul jerin jasy egde azamattar yqylym zamandaǵy adamdardyń mekeni degendi jıi aıtady. Solaı ekenine taǵy bir márte kóz jetti.
«Mundaǵy erekshe jazý kózge ottaı basyldy. Tarıhshy bolmaǵan soń, arnaıy mamandy shaqyrýǵa týra keldi. Nátıjesinde, jartastaǵy jazý kóne tarıhtan syr shertip turǵanyn bilip, qýanyp qaldyq», deıdi eriktilerdiń biri Asyljan Pazylbekov.
Qola dáýirinde ǵumyr keshken adamdar tanymyndaǵy dúnıeni tasqa túsirip, ómir súrý saltyn jartasqa qashap qaldyrǵan eken. Jartas betindegi beıneden túrli janýardyń kelbetin ańǵarǵandaı kúı keshesiń. Ashyq aspan astyndaǵy qundylyqtar jınalǵan aýmaqta júzden astam petroglıf bar desedi.
«Qarataý jotasy – elimizdegi kıeli aımaqtardyń biri retinde belgili. Tarıhı-geografııalyq mańyzy zor óńirde myńjyldyqtardan syr shertetin qundylyqtar az emes. Endi bul mańaıdy ǵalymdar arnaıy zerttegeni abzal. Zertteý jumystarynyń nátıjesine sáıkes óńirdi týrıstik baǵyttardyń qataryna qosýǵa múmkindik týýy yqtımal», deıdi tarıhshy-arheolog Saýran Qalıev.
Kóne tarıhtan syr shertken eskertkishter qory Berikqara men Qarataýdyń teriskeıinde sırek te bolsa bar. Mundaǵy tańbaly tastardy ǵalymdar adamzat tarıhy úshin qajetti ǵylymı jańalyqqa telip otyr.
Jambyl oblysy
