Foto: kaz.inform.kz
Jıynda Memlekettik keńesshi Prezıdent Qasym-Jomart Toqaevtyń Qazaqstan jastarynyń quqyqtary men múmkindikterin keńeıtýge aıryqsha mán beretinin atap ótti. Prezıdenttik jastar kadr rezervi, jastar kásipkerligin damytý, sondaı-aq kreatıvti ındýstrııany qurý úshin daryndy jastarǵa qoldaý kórsetý sııaqty jas urpaqtyń múddesin jáne qajettiligin eskeretin jobalar men baǵdarlamalar – sonyń aıqyn dáleli.
Prezıdent janyndaǵy Jastar saıasaty jónindegi keńes jastar saıasatyn qalyptastyrýmen jáne ony júzege asyrýmen aınalysatyn negizgi qurylym sanalady. Jastar onyń jumysyna belsendi aralasyp, túrli ıdeıalar men jobalar usynady, osylaısha elimizdiń damýyna úles qosady.
Mysaly, keńes músheleri Memlekettik jastar saıasatynyń 2029 jylǵa deıingi tujyrymdamasyn ázirleýge tikeleı atsalysty. Sondaı-aq Jastar saıasaty jónindegi keńes músheleriniń bastamasymen Nashaqorlyqqa jáne esirtki bıznesine qarsy kúrestiń 2023-2025 jyldarǵa arnalǵan keshendi jospary qabyldandy. Qazirgi ýaqytta keńes zańsyz oıyn bıznesine jáne lýdomanııaǵa qarsy kúres jóninde keshendi jospar ázirlep jatyr.
Kezdesý sońynda Erlan Qarın qyrǵyz jastaryn qyzyqtyrǵan suraqtarǵa jaýap berdi.
