Qazirde elimizdiń ár óńirinde damý baǵdarlamasy, sondaı-aq ınfraqurylymdyq, ınvestısııalyq jobalar júzege asyrylyp jatyr. Nátıjesinde, jumysshy jáne orta býyn mamandaryn daıarlaý qajettigi týyndap otyr. Bul rette kolledjderdiń róli artyp keledi.
«Tehnıkalyq jáne kásiptik bilim berý mekemeleri eń aldymen jergilikti eńbek naryǵyna qajet mamandardy daıarlaýy qajet. Ol úshin eń bastysy kolledjderdiń oqytýshylyq quramyna, materıaldyq-tehnıkalyq jabdyqtalýyna jáne sapaly bilim baǵdarlamalaryna nazar aýdarylýǵa tıis. «Jas maman» jobasy aıasynda birqatar kolledjdiń bazasy jabdyqtaldy. Ár aımaqta ozyq tájirıbe jınaqtaǵan oqý oryndary bar. Olar tirek kolledji jáne quzyrettilik ortalyq esebinde ózge bilim berý mekemelerine kómek berýi shart», dedi T. Dúısenova.
Keńester aıasynda ár aımaqtyń oń tájirıbeleri qarastyrylyp otyr.
Máselen, Shymkentte 2 kolledj bazasynda qanatqaqty joba aıasynda eksperımenttik toptar uıymdastyrylǵan. Munda mekteptiń joǵary synyp oqýshylary sabaqtan bos ýaqytta túrli mamandyq meńgeredi. Atap aıtqanda, 30 bala tiginshilik isin úırenip jatyr. Osyǵan uqsas tájirıbeler barlyq óńirde bar.
Taǵy bir mysal – Jambyl oblysyndaǵy Qordaı aýdanynda sheteldik mamandar qoldaýymen kolledj ishinen tigin sehi ashyldy. Qazir ol óńirdegi suranysty qamtý úshin iri tapsyrystar alyp, qyzmet kórsetip jatyr. Munda kolledj stýdentteri kásiptik praktıkadan ótip, tájirıbe jınaqtap, ári qaraı jumysqa ornalasa alady.
Halyqaralyq áriptestik aıasynda Almaty qalasynda da oń tájirıbe bar. Bıyl 20 kolledjdiń 200 arnaıy pánder oqytýshylary men óndiristik oqytý sheberleri shet memleketterde taǵylymdamadan ótti. Bul baǵyttaǵy jumys aldaǵy ýaqytta da jalǵasyn tabady. Sondaı-aq almatylyq kolledjderge kásiporyndardan tájirıbeli mamandardy tarta otyryp, kadr daıarlaý isi jolǵa qoıylǵan.
«Tehnıkalyq jáne kásiptik bilim berý uıymdarynyń oń tájirıbeleri keńinen taratylýy kerek. Bul jumys Oqý-aǵartý mınıstrliginiń turaqty nazarynda bolýǵa tıis. Basty maqsat – túlek daıyndaý ǵana emes, jastarǵa turaqty jumysqa ornalasa alatyndaı jaǵdaı jasaý. Kolledjderdiń tek memlekettik tapsyrysqa ıek artýy durys emes. Jumys berýshiler de ózderine qajet mamandardy daıarlaýǵa at salysýy kerek. Oǵan qosa, kolledjderde qazir óndirilgen ónimnen túsetin tabys sol mekemede qalatyndaı múmkindik berilgen. Muny materıaldyq-tehnıkalyq bazany jaqsartýǵa jáne pedagogterdiń biliktiligin arttyrý úshin qosymsha tabys kózi retinde qarastyrýǵa bolady», dedi Premer-mınıstrdiń orynbasary.
