О́ner ıesi syrt kózge qatal kóringenimen, shyn máninde kóp jylaıtynyn jetkizdi. Bolat Ábdilmanov týyp-ósken aýyly jaıly aıtyp, stýdent kezinde úıine oralǵan sátterin eske aldy.
- Elge aıtsam, senbeıdi. Biraq men negizi kóp jylaımyn. Kóbisi meni qatygez, qatal, qatty dep oılaıdy. Úıde otbasymmen kıno qarap otyrǵanda eshkim jylamasa, bir sátterde men jylap qalamyn. Jylaǵan sátterim kóp boldy. Almatydan aýylǵa saǵynyp barǵanda jylaıtynmyn. Avtobýspen aýylǵa kirgen sýyq bolyp kórinetin edi. Sol sebepti 5-6 shaqyrym qalǵanda túsip qalyp, án aıtyp kiretinmin. Sol kezde jylaıtyn edim, - dedi akter.
Sonymen qatar óner ıesi otbasy jaıly jan syryn aqtaryp, ne sebepti óziniń týǵan ata-anasynyń tárbıesinde bolmaǵanyn ashyp aıtty. Bolat Ábdilmanovty kishkentaı kezinde ákesiniń aǵasyna asyraýǵa bergen.
- Aǵaıynshyldyq degen qazaqtyń dástúri. Bir úıde bes kisi. Eń úlkeniniń balasy bolmaǵan. Ortanshysy - akter adamdar. Men dúnıege kelgende ájem úıge kelip, ortanshy balasynyń qyrqynan shyqpaǵan sábıin (red. meni) aýylǵa úlken ulyna aparyp beredi. Meni qoıshynyń balasy dep jazdyrǵan. Maǵan bul jaıly eshkim aıtpaǵan. 18 jasymda bir-aq bildim. 14 jasymda meni ósirgen anam qaıtys boldy. Úıdiń jalǵyz balasy, mekteptegi alǵyr oqýshy bolǵan maǵan bul jaǵdaı aýyr tıdi. Birden eseıip kettim. Keıbir balalardy beredi, keıin olar báribir óz áke-sheshesine ketip qalady. Menińshe, bul durys emes. Týdy, árıne. Biraq tún uıqysyn tórt bólip, seni asyrap jetkizgen adam naǵyz ata-ana dep oılaımyn", - dedi akter "Alǵashqy" baǵdarlamasynda.
