Halqymyz «Er basyna kún týsa, etigimen sý kesher» deıdi. Beıbit kúnniń ózinde túrli qylmystyń aldyn alyp, qara basyn qaýip-qaterge tigip júretin polısııa qyzmetkerleri qazirde tipti qaýyrt jumys kestesine kóshken.
Osy kezge deıin Batys Qazaqstan oblysynda 8 myńdaı adam tasqyn sýdan qaýipsiz jerge kóshirilse, sonyń barlyǵynyń basy-qasynda quqyq saqshylary júrdi. Sý shaıyp, jabyny búlingen joldardyń tusynda da táýlik boıy kezekshilik uıymdastyryp, qaýipsizdikti qamtamasyz etip júr.
BQO polısııa departamentiniń basshysy, polısııa polkovnıgi Arman Orazalıevtiń aıtýyna qaraǵanda, oblys boıynsha sý tasqynyna qarsy is-sharalarǵa kúni búgin 700-den astam polısııa qyzmetkeri men 104 tehnıka jumylǵan.
Adam balasy qyzyq. Keıbir kisiler búkil elge kelgen qaýip-qater jalǵyz ózin aınalyp ótip keterdeı qamsyz júredi. Tilsiz jaý tabaldyryǵyna kelip, sheginetin jer qalmaǵanda sharasyz kúıge túsedi. Polısııa qyzmetkerleri osyndaı talaı jandy ajaldan arashalap alyp shyqty.
Mysaly, ótkende erigen sý Uzynkól sý qoımasyna jan-jaqtan quıylyp, bógetti buzyp kete jazdady. Irgedegi aýyldy basyp ketý qaýpi tóndi. Syn saǵatta aýyl turǵyndarynyń ózin ǵana emes, mal-múlki men tórt túlik malyn qutqarý qajet boldy. Osy qarbalastyń ishinde tótenshelikter jáne Ulttyq ulan sarbazdarymen birge polısııa qyzmetkerleri de júrdi. Sol kúnderi Uzynkól, Jańaómir, Kemer, Iýbıleınyı eldi mekenderinen 2 829 adam kóshirilgen eken.
Sáýirdiń 4-i kúni «Vympel» saıajaıynda tosyn oqıǵa boldy. Aldyn ala habarlandyrýǵa qaramastan, saıajaı úıleriniń birinde adam qalyp qoıǵan. Qas pen kózdiń arasynda aınalaǵa lap qoıǵan tasqyn sýdyń ortasynda qalǵan beıshara úıiniń shatyryna shyǵyp úlgerip, saıajaı tóraǵasyna habarlasypty. Dabyl Shaǵan polısııa bólimine de tústi. Jergilikti polısııa qyzmeti bólimshesi №21 ýchaskelik polısııa pýnktiniń aǵa ýchaskelik ınspektory, polısııa kapıtany Dıdar О́tepov oqıǵa ornyna jedel jetip, sý ortasynda qalǵan azamatty qaıyqpen qutqaryp aldy.
Al sáýir aıynyń 2-sinen 3-ine qaraǵan túni bolǵan myna oqıǵa da bir otbasynyń tragedııasyna aınala jazdady. 1966 jyly týǵan azamat Aqsaı qalasynda vahtalyq jumysynan shyǵyp, ózi turatyn Keńtúbek aýylyna jaıaý tartyp ketipti. Aýylǵa 5 shaqyrym jaqyn kelip, aınalany sý basyp ketkenin kóredi. Keship ótýge sýdyń aǵysy qatty, aınalýǵa basy kórinbeıdi, tas qarańǵy. Sóıtip, júrgende telefonynyń qýaty taýsylady. Amalsyzdan turǵan jerinde kómek kútýge týra keledi. Jaǵdaıdy aıtyp, polısııadan kómek suraǵan jubaıy qatty alańdaýly edi. Tún ishinde aýyldyń ýchaskelik polısııa ınspektory, polısııa aǵa leıtenanty Ashat Káýkeev jolǵa shyǵyp, aýyl adamdarymen birge traktormen tóńirekti sharlap shyqty. Abyroı bolǵanda azamat tabyldy, qatty tońyp qalǵanymen din aman bolyp shyqty. Aıta berse, mundaı mysaldar kóp.
Qazir batysqazaqstandyqtar Jaıyqtan keletin joıqyn sý tasqynyn qarsy alýǵa daıyndalyp jatyr. Myńdaǵan adam ózen jaıylmalaryndaǵy eldi mekenderden qaýipsiz jerge kóshirildi. Olardyń turǵyn úılerin de suǵanaq qoldardan polısııa kúzetip tur. О́ńirdiń sý basý qaýpi bar aımaqtary men sý nysandarynda 24 saǵattyq kezekshilik uıymdastyrylǵan.
Oblystyq polısııa departamentiniń basshysy Arman Orazalıev jaqynda oblys prokýrory, 3-synypty memlekettik ádilet keńesshisi Serik Shalabaevpen birge qala mańyndaǵy eldi mekender men saıajaı qoǵamdaryn aralap shyqqan edi.
Jergilikti turǵyndarmen bolǵan bul kezdesýler óte paıdaly boldy. Halyqtyń kóńilindegi ýaıym seıilgen syńaıly. Jeke múliktiń saqtalýy, adam quqyǵynyń qorǵalýy, tabıǵat apatynan kelgen shyǵyndardyń ornyn toltyrý máselesi kópshilikti alańdatatyny anyq. Quqyq qorǵaý salasynyń joǵary laýazymdy basshylarymen tike júzdesip, saýaldaryna naqty jaýap alǵan halyq jergilikti bılik ókilderi, memleket tarapynan jasalyp jatqan keshendi qamqorlyqqa alǵys aıtty.
– «Apat aıtyp kelmeıdi». Sý tasqyny kútpegen sátte kelip, birshama aýyldy, úılerdi shaıyp ketti. Biraq men sizderge Batys Qazaqstan polısııasynyń jeke quramy qashanda halyqpen birge ekenin aıtqym keledi. Biz úshin eń mańyzdysy – azamattardyń amandyǵy, qoǵamdyq tártipti saqtaý, qoǵamdaǵy, joldaǵy qaýipsizdikti qamtamasyz etý. Polısııa qyzmetkerleri tikeleı mindetterimen qatar sý basqan jáne sý basý qaýpi bar aýyldarda, saıajaılarda táýlik boıy qyzmet etip, qolynan keletin barlyq kómekti kórsetip jatyr. Elimizdiń basyna túsken bul synaqty birge eńserýge biz daıynbyz, – dedi óz sózinde polısııa departamentiniń basshysy.
Batys Qazaqstan oblysy
