Foto: direct.farm/
S.Seıfýllın atyndaǵy Qazaq agrotehnıkalyq zertteý ýnıversıtetiniń ǵalymdary prokarıottyq prodýsenttik shtammdarmen ekspressııalanǵan biriktirilgen rekombınantty Brucella spp aqýyzdarymen sensıbılızasııalanǵan erıtrosıtterdi paıdalanýǵa negizdelgen brýsellezdi serologııalyq dıagnostıkalaýǵa arnalǵan janama gemagglıýtınasııa reaksııasy-jınaǵyn ázirledi.
«Otandyq quramdas bólikterden jasalǵan janama gemagglıýtınasııa reaksııasy-jınaǵyn dıagnostıkalyq tájirıbege engizý dıagnostıkýmnyń qarapaıymdylyǵy men tómen quny esebinen veterınarııalyq is-sharalardyń tıimdiligin edáýir arttyrady. Al álemdik veterınarııalyq tájirıbede alǵash ret erıtrosıttik antıgen retinde paıdalanylatyn rekombınantty aqýyzdar klassıkalyq serologııalyq reaksııalarǵa tán jalǵan oń nátıjelerdi qospaǵanda, serologııalyq zertteýlerdiń ereksheligin arttyrýǵa múmkindik beredi. Dıagnostıkýmdy adamdarda brýsellezdi dıagnostıkalaýǵa da qoldanýǵa bolady. Bul áleýmettik qaýipti zoonozdyq ınfeksııany joıýda mýltıplıkatıvti áser etedi», deıdi ǵylymı jobanyń jetekshisi, veterınarııa ǵylymdarynyń doktory, QazATZÝ Mıkrobıologııa jáne bıotehnologııa kafedrasynyń professory Aıtbaı Býlashev.
Brýsellezdiń dıagnostıkasy janýarlardyń basqa da asa qaýipti aýrýlarynyń dıagnostıkasy sekildi memlekettik monopolııaǵa jatqyzylǵan. Sondyqtan janama gemagglıýtınasııa reaksııasy-jınaǵynyń negizgi tutynýshylary - Respýblıkalyq veterınarııalyq zerthana, onyń oblystyq jáne aýdandyq bólimsheleri, sondaı-aq QR AShM Veterınarııalyq baqylaý jáne qadaǵalaý komıtetiniń Veterınarııa jónindegi ulttyq referenttik ortalyǵy.
Joba nátıjesinde erıtrosıtterdiń (qatty fazanyń) syrtqy membrananyń jalǵyz rekombınantty aqýyzdarymen (Omp19, Omp25, Omp31) jáne Brucella tektes bakterııalardyń perıplazmalyq keńistigimen (SOD jáne BP26), sondaı-aq hımerıkalyq aqýyzdarmen (omp19+25; Omp25+31; Omp19+31) sensıbılızasııasy úshin ońtaıly jaǵdaılar jasaldy. Jeke aqýyzdardan erıtrosıttik antıgen daıyndalyp, olardyń janama gemagglıýtınasııa reaksııasy-jınaǵyndaǵy gomologııalyq jáne geterologııalyq sarysýlardaǵy antıgenderi zertteldi. Atalǵan rekombınantty brýsella aqýyzdarynyń E.coli-prodýsentteri shtammdarynyń bakterııalyq massasy ázirlendi jáne nysanaly ónimdi tazartý júrgizildi.
