Qalamgerler shoǵyrynan Baýyrjan Momyshuly, Saparǵalı Begalın, Qalıjan Bekhojın, Muhametjan Qarataev, Ábdilda Tájibaev, Ábý Sársenbaev, Syrbaı Máýlenov, Saǵı Jıenbaev, Ánýar Álimjanov, Sherhan Murtaza jáne basqa jaqsy-jaısańdardyń beınesin tanýǵa bolady. Jazýshylar odaǵynyń foıesinde ıin tiresip turǵan jazýshylar sáýletti saraıdyń saltanatyn odan saıyn arttyryp turǵandaı. Sonymen qatar korıfeılerdiń aldynda maldas quryp otyrǵan jap-jas Dıdahmet Áshimhanulynyń da otyrǵanyn baıqaımyz. Ataýly kúnniń aıshyqty oqıǵasy tilshi kúndeliginen shet qalmaǵan eken.
«Jazýshylar odaǵynda ótken Ǵ.Músirepovtiń 75 jyldyǵyna qatystyq. Keshke Ǵ.Mustafın basshylyq etti. M.Qarataev baıandama jasady.
Kesh sońynda Ǵabıttiń ózi sóıledi. Ǵabań sózinen jadymda qalǵany da, janyma jaqqany da mynaý boldy:
«Men keıbir jas jazýshylarǵa renjımin. Shyǵarmalaryn oqyp otyrǵanda shıkilikteri bilinip turady. Sol sátte men «Átteń osy dúnıesin jazyp bolǵannan keıin jarty ne bir jyldan soń qaıta bir jazyp shyqsa ǵoı, budan múlde basqa, táýirirek dúnıe bolar ma edi», dep oılaımyn.
Tamasha aıtylǵan sóz. Átteń, soǵan árkimniń shydamy jete bermeıdi-aý. Ǵabańnyń sózi tegin emes. Qazaq «sózine qarap ózin tany» deıdi emes pe? Úlken sýretker jetpis beske kelgenshe belgili-belgili bes-alty-aq shyǵarma berýi úlken syrbazdyqtyń belgisi ǵoı. Syrbaz emeı nemene, eger sol shyǵarmalarynyń bireýiń arqaýy bos bolmasa. Ǵabań – sondyǵymen Ǵabań. Ǵabań – sondyǵymen D.Snegın aıtqandaı, uly jazýshy.
Saǵı Jıenbaevtyń arnaý óleńi tamasha shyqty. Aqyn Ǵabańa: «Kisiligimiz sizdeı bolsyn. Kıimdi sizdeı kıip, temekini de sizdeı sulý tartsaq», dedi-aý. Artyqtyǵy joq. Chehovtyń: «Adam kıgen kıimimen de, minezimen de, tulǵasymen de sulý bolý kerek», degenine saıady. Úırenýge bolatyn nárse. Tipti qajet te», dep jazba qaldyrypty D.Áshimhan 1982 jyldyń 31 naýryzynda.
Al Dıdahmet dosynyń qasyna qazirgi belgili jazýshy Álibek Asqarov jaıǵasqan. Ol kisiden de sýret týraly estelik suradyq. «Men ol kezde sýretshiler ýchılıshesinde dıplomdyq jumysymdy qorǵap jatqan kezim. Ádebıet áleminiń tabaldyryǵyn áli attamaǵan edim. Tek Dıdahmet Áshimhanov, Mereke Qulkenov, Bolat Qanatbaev, Ulyqbek Esdáýletov sııaqty dostarymnyń qolqasymen Zeınolla Qabdolovtaı akademıkterdiń ádebı seksııasyna baratynmyn. Myna sýret te sol jyldardyń muǵdarynda túsirilgen. Bul meniń jazýshylar ortasynda túsken tuńǵysh sýretim eken», deıdi jazýshy.
Iá, qazir bul qalamgerlerdiń jartysynan kóbi aramyzda joq. Al sol kezdegi bozjeıde jas jazýshylar bul kúnde úlken rýhanııat ustyndaryna aınalyp otyr.
