Baýyrlas elderdiń kómegi

Qysyltaıańda eldiń belsendi, janashyr, qaltaly azamattary úı-jaıy sý astynda qalǵan aǵaıynǵa kómekke asyqty. Eriktiler qutqarýshylarǵa ilesip, tasqynnyń aldyn alý jumystaryna aralasty. Qala, aýdan, aýyldardan jylý jóneltildi. Sáýir­diń basynda Qyrǵyzstan mınıstrler ka­bınetiniń basshysy Aqylbek Japarov Qyrǵyzstan tótenshe jaǵdaılar mınıstrliginiń búgin-erteń Qazaqstanǵa gýma­nı­tarlyq kómek jóneltetinin habar­laǵan. Aıtsa aıtqandaı-aq kóp uza­maı Qyrǵyzstannyń Tótenshe jaǵdaı mınıstr­ligi jóneltken 15 júk kóligi men jol talǵa­maıtyn bir kólik el shekarasynan ótti. 300 tonnaǵa jetaǵabyl júkte sý, kúrish, qara­qumyq jarmasy, shaı, qant, taǵysyn-taǵy azyq-túlik qory bolǵan.

Jylytqysh, kereýet, shatyr jáne basqa da kerek-jaraq tıel­­gen. Osy mezgilde Prezıdent Qasym-Jomart Toqaev Qyr­ǵyz­stan halqyna kórsetken kómegi úshin alǵys aıtyp, Túrkııa, Tájik­stan­nyń memleket basshylarymen telefon arqyly sóılesti.

Sý tasqyny saldarynan qalyp­tasqan kúrdeli ahýalǵa baıla­nysty qoldaý kórsetkeni úshin alǵys aıtty. Baýyrlas elder sý tasqynyna baılanysty qajetinshe kómek kórsetýge daıyn ekenin de málimdedi. Ázerbaıjan Syrtqy ister mınıstrligi baýyrlas eldegi jaǵdaıǵa alańdaýly ekenin habarlady. Baýyrlas elder qıyn-qystaý kúnderde qazaqstandyqtarmen nıet­tes eke­nin baıqatty.

Al jaqyn beride Tájikstannan sý basqan aımaq turǵyndaryna 56 vagon jáne 15 júk kóligimen gýmanıtarlyq kómek jetti. Vagon­da azyq-túlik pen kúndelikti tutynatyn taýarlar, qurylys materıaldary bar. Taýardyń jalpy kólemi 3 500 tonnadan asady. Tájikstan delegasııasyn bas­tap kelgen qonaqtardy Túrkistan oblysynyń jurtshylyǵy «Sary­aǵash» temirjol stansasynan kútip alyp, tájik halqyna alǵys aıtty. Tájikstan tarapy Qazaqstandaǵy ahýalǵa beıjaı qaramaı, kómek kerýenin jóneltýge asy­ǵypty. Sodan qurylys materıaldary men azyq-túlik tıelgen gýmanı­tar­lyq kerýen ári qaraı sý bas­qan aımaqtarǵa jóneltildi.

Osyǵan deıin О́zbekstannan elge 15 júk kóligimen gýmanı­tar­lyq kómek jetti. Túrkistan oblysyndaǵy Qonysbaev keden beketinen ótken kómek kerýenin bastap kelgen delegasııany oblys basshylyǵy kútip alyp, kórshi eldiń iltıpatyna alǵys aıtty. Júk kólikterine turmysqa qajetti zattar men qurylys materıaldary, tósekter, kıim-keshek sekildi basqa da zattar tıelgen. О́zbekstannan kelgen delegasııanyń qataryndaǵy Sherzodhon Qýdırathodja baýyr­las­ elderdiń yntymaq-birligi ajy­­ra­masyn dep qazaq halqyna ti­lek­­tes ekenin bildirdi.

– Qazir qazaq baýyr­­larymyz tabıǵı apattan zar­dap shegip jat­qan­da biz qalaı kómek kórsete alamyz, basqa túsken aýyrt­pa­lyq­ty qalaı jeńildetemiz dep ózara aqyl­das­tyq. Qazir 300 tonnadan asa eń kerekti zattardy jınap ákeldik. Munda azyq-túlikten bastap asa qajetti qural-jabdyqtar bar. Baýyrlas elderdiń yntymaq-bir­li­gi ajyramasyn. Apattardan aman bolaıyq. Biz sizdermen qa­shanda birgemiz, – dep izgi tilegin jetkizdi delegasııa ókili.

Osydan soń Memleket basshysy Qasym-Jomart Toqaev О́zbekstan Prezıdenti Shavkat Mırzııoevpen telefon arqyly sóılesip, eldegi tabıǵı apatta tileýlestik tanytyp, kómek kór­setkeni úshin Prezıdenttiń ózine jáne baýyrlas О́zbekstan halqyna alǵys aıtty.

Qysyltaıań ýaqytta izgi nıetti, qamqor jandar sý basqan ólke­ler­ge qoldan kelgen kómegin aıanyp qalmady. Qaltaly azamat­tar bir jaǵyna shyǵysyp, qoldaý kórsetti. Kórshi elderden de ton­nalap kómek kerýeni jetti. Árı­ne, apat aımaqtaryna memleket kóleminde kómek kórsetilip jatqan soń, úı-kúısiz qalǵan azamattar tasada qalmaıtyny túsi­nikti ǵoı. Degenmen qazaq hal­qymen yqylas-nıeti bir, dos­tyq qarym-qaty­nasy berik el­derdiń kórsetken qoldaýynyń jóni bólek bolady eken. Eldegi ahýalǵa alańdap, kómek kórsetýge asyqqan memleketterge Qazaqstan halqynyń alǵysy zor.