Joǵaryda atalǵan sý basqan aýdandardyń turǵyndaryna gýmanıtarlyq kómek qajet, atap aıtqanda aýyzsý, nan, gıgıenalyq quraldarǵa shuǵyl qajettilik bar. Munda QR Ulttyq ulanynyń áskerı qyzmetshileri – ushaqtar men tikushaqtardaǵy ushqyshtar halyqqa kómekke keldi. Ushqyshtar basqa aımaqtardyń turǵyndary, korporasııalar, sondaı-aq kórshi memleketterden jınalǵan 140 tonnaǵa jýyq gýmanıtarlyq júkti jetkizdi. О́z kezeginde, ulandyqtar 600 tonnadan astam júk túsirdi. Gýmanıtarlyq kómektiń negizgi bóligi Aqtóbe, Atyraý, Batys Qazaqstan, Qostanaı jáne Soltústik Qazaqstan oblystaryna jiberildi.
Búgingi kúni áskerı qyzmetshiler polısııa qyzmetkerlerimen jáne qutqarýshylarmen birlesip sý tasqyny saldaryn joıýdy jalǵastyryp jatyr. Sondaı-aq sý tasqynyna qarsy is-sharalar men avarııalyq-qutqarý jumystary, erigen sýlardy aıdaý, ınertti materıaldary bar qapshyqtardy tóseý, sý aıdyndarynyń jaǵalaýdy nyǵaıtý jumystary, kanaldar men aryq júıelerin tazartý, adamdardy qaýipsiz oryndarǵa evakýasııalaý júrgizilip jatyr.
Máselen, Atyraý oblysynda 5546 (Atyraý q.) jáne 5451 (Qaraǵandy q.) áskerı bólimderinen 600-ge jýyq quqyqtyq tártip áskeri tartyldy. Budan basqa, 6506 áskerı bóliminiń (Shymkent q.) 300 áskerı qyzmetshisi jáne 5547 áskerı bóliminiń (Qyzylorda q.) jeke quramynyń 200 adamy Batys Qazaqstan oblysynda jaǵalaýdy nyǵaıtý jumystaryna, qapshyqtardy daıyndaýǵa jáne salýǵa kómektesedi. Sonymen birge 5517 áskerı bóliminiń (Oral q.) 80 áskerı qyzmetshisi patrýldik-bekettik qyzmet atqarady. Taǵy 300-ge jýyq sarbaz sý tasqynyna qarsy is-sharalarda jergilikti halyqqa kómek kórsetip keledi.
Ulandyqtar sý basqan aýmaqtarda kúndiz-túni tynbaı kómek kórsetip júr. Qaýipsizdik maqsatynda sarbazdar azamattardy sý basqan úılerge jibermeıdi. Áskerı qyzmetshiler tonaý áreketterin boldyrmaý úshin bar kúshin salady.
Sý tasqyny saldaryn joıýǵa Qostanaı jáne Soltústik Qazaqstan oblystarynyń qalalary men kentterinde 6697 (Qostanaı q.) jáne 6637 (Petropavl q.) áskerı bólimderiniń áskerı qyzmetshileri, QR Ulttyq ulany Akademııasynyń kýrsanttary belsendi qatysady. Olarǵa elordalyq jedel brıgadanyń tártip saqshylary kómekke jiberildi. Soltústik aımaqtardaǵy Ulttyq ulannyń kúshter toby 400-den astam adamdy quraıdy.
Jalpy, sý basqan óńirlerde saldardyń aldyn alý jáne joıý úshin polıseılermen, qutqarýshylarmen jáne eriktilermen birlesip sý tasqynyna qarsy is-sharalarǵa belsendi qatysatyn 3000-nan astam Quqyqtyq tártip áskeri tartyldy. Ulandyqtar 120-dan astam avtokólik tehnıkasyn paıdalanady, 1769 adam evakýasııalandy, 1 mıllıon 101 myń qap daıyndalyp, tóseldi.
