Berdenbek Edilhan – Jáıremniń týmasy. Ol 2012 jyldan beri jeke kásippen aınalasady. Kásibiniń baǵyty ár alýan. Júk tasymaly da, mal sharýashylyǵy da bar. «Eńbek etkenge násip mol» deıdi ol. On shaqty jyldyń aıasynda kásibin dóńgelete bilgen Berdenbek osydan úsh jyl buryn kenttegi burynǵy «balabaqshany» satyp aldy. Bul jerde balabaqsha sózin tyrnaqshalap otyrǵanymyz beker emes, óıtkeni, 90-jyldardyń joıqyn jekeshelendirýi tusynda jekeniń qolyna ótip, sodan ábden tozǵan nysannyń qańqasy ǵana qalǵan edi. Kásipker sonda ne úshin qyzyqty eken?
– Burynǵy balabaqsha ornyna jańasyn ornatqym keldi. Sóıtip, soǵan deıingi jıǵan-tergenimdi jumsap, qurylys jumysyn bastap jiberdim. «Kóz – qorqaq, qol – batyr» degen emes pe? Nysannyń bir basyna shaǵyn-market ornalasty. 2023 jyly kentimizge oblys basshysy kelgende ózimniń balabaqsha týraly oıymdy aıtyp edim, ol kisi tolyq qoldaý tanytty, – deıdi B.Edilhan.
Ol balabaqsha ataýyn «Ajar» dep atady. Bul sózde kóp maǵyna bar. Eń bastysy, «Ajarymyz ashyq bolsyn» degen maqsat-murat jatyr ataýdyń astarynda.
Balabaqsha 125 orynǵa arnalǵan. 20 maman jumyspen qamtylǵan munda 2-5 jas aralyǵyndaǵy baldyrǵandar tárbıelenedi. Ǵımarat balalardyń jan-jaqty damýyna múmkindik beretin zamanaýı damý aımaqtarymen, STEM kabınetimen, horeografııa zaly jáne emdik tuzdy bólmemen jabdyqtalǵan.
«Ajardyń» taǵy bir ereksheligi, mundaǵy ár toptyń óz ataýy bar. Aıtalyq, «Alash», «Abaı», «Ybyraı», «Qanysh» degen tárizdi.
– Maǵan mundaı aqyl -keńes bergen Qazaqstan halqy Assambleıasy Analar keńesi tóraǵasynyń orynbasary Baıan Aqataı. Ulttyq qundylyqtardy balalardyń boıyna jastaıynan sińire bilý – basty maqsat. Endeshe, top ataýlaryn ulttyń uly tulǵalarynyń esimderimen atap, olardyń ónegeli ómir jolyn balalarǵa neǵurlym keńirek túsindire beretin bolsaq, utarymyz bolmasa utylysymyz bola qoımas, – degen Berdenbektiń sózi onyń bala tárbıesindegi jan-jaqty izdenisin kórsetedi.
Memleket árqashan kásipkerliktiń damýyna, keń qanat jaıýyna múddelilik tanytyp keledi. Bul bekerden-beker emes. О́ıtkeni shaǵyn jáne orta kásipkerlik damyǵan saıyn elimizdegi kez kelgen sala damı túsedi. Berdenbektiń balabaqshasy sonyń bir aıǵaǵy tárizdi.
Ulytaý oblysy,
Jáırem kenti
