Foto: astanatv.kz
Qyrǵyzstannyń Kabar agenttigi sınoptıkterdiń boljamyna súıenip, Talas, Osh, Jalal-Abad, Batken, Naryn oblystarynyń basym bóliginde, Shý, Ystyqkól oblystarynyń keı jerlerinde jańbyr jaýyp, naızaǵaı oınap, taýly aımaqtarda qar jaýady dep habarlaıdy. Taý bókterinde jáne joldardyń taýly bólikterinde qar jaýyp, kóktaıǵaq bolady. Batystan soǵatyn jel jyldamdyǵy 4–9 m/s jetedi.
Tótenshe jaǵdaılar mınıstrligi zardaptardyń aldyn alý úshin aryqtar men drenajdyq arnalardy tazalaýǵa keńes beredi.
Al Osh oblysynda tótenshe jaǵdaı rejimi engizildi. Oblystyń eldi mekenderindegi selge baılanysty shuǵyl sharalar qabyldandy. Myrzake – Qara – Qulja – Alaıqýý tasjolynyń 41-shi shaqyrymynda sel júrip, bir adam qaza tapty. Laı aǵyny bir otbasynyń tórt adamy kele jatqan kólikti basyp qaldy. Jergilikti turǵyndar eki áıel men bir balany aman alyp qaldy. Er adamdy sel alyp ketken. Qutqarýshylar onyń denesin taýyp, týystaryna tapsyrdy.
Baýyrlas eldegi aýyr jaǵdaıǵa Qazaqstan azamattary alańdaýshylyq tanytyp, áleýmettik jeliler arqyly amandyq tilep, nıettes ekenin bildirip jatyr.
