О́ńirlik kommýnıkasııalar qyzmetiniń aqparattyq alańynda qoǵamda beleń alyp bara jatqan ınternet-alaıaqtyq faktilerimen kúres sharalary saralandy. Bul týraly oblystyq Polısııa departamenti krımınaldyq polısııa basqarmasy bastyǵynyń orynbasary Maqsat Baımaǵanov tolyǵyraq baıandady.
«Qazirgi tańda ǵalamtor jelisi arqyly jasalatyn qylmystardy boldyrmaý maqsatynda Qyzylorda qalalyq polısııa basqarmasynda turaqty «CyberPol» jedel tergeý tobymen júıeli jumystar atqarylyp jatyr. Alaıaqtyq jasaýdyń negizgi jáne basty sebebi - azamattardyń sengishtigi. Mundaı qylmystardyń betin ashý jáne tergeý barysynda birshama qıyndyq týyndaıdy. О́ıtkeni, qylmysker úshinshi adamǵa tirkelgen ártúrli bank kartalaryn, sondaı-aq túrli abonenttik nómirlerdi, aqsha sheship alý úshin jalǵan adamdardy paıdalanady. Atalǵan qylmysty ashý úshin zań júzinde alynǵan derekterdi muqııat taldaý qajet jáne bul uzaq ýaqytty talap etedi. Búginde ınternet arqyly jasalǵan alaıaqtyq qylmysynyń aldyn alý, boldyrmaý baǵytynda birshama is-sharalar atqarylyp jatyr. Buqaralyq aqparat quraldary arqyly oblystyń turǵyndaryna túsindirý jumystary júrgizilip, alaıaqtardyń arbaýyna túsip qalmaý týraly, qandaı saqtyq sharalaryn saqtaý kerektigi de túsindirilip jatyr. Alaıaqtardyń arbaýyna túspeý úshin turǵyndar saqtyq sharalary retinde jeke derekterin qatań saqtaýy kerek. Oǵan qosa ózine tıesili plastıkalyq kartalardyń málimetterin, SMS-kodtar men qupııa sózderdi eshkimge aıtpaýǵa jáne belgisiz ári tekserilmegen saıttarda tólem jasamaýlaryn suraımyn. Sonymen qatar telefon men kompıýterge TeamViewer, AnyDesk jáne RustDesk dep atalatyn arnaıy baǵdarlamalardy ornatpaýǵa shaqyramyn», dedi Maqsat Baımaǵanov.
Qyrmyzy JUMAǴALIQYZY,
EUÝ stýdenti
