Sýretti túsirgen – Tileýbek Shaıahmet
Erekshe kóz tartatyn barelefti fıgýra taza altynnan quıylǵan. Buǵyny sheber jatqan qalypta beınelepti. Aıaqtary búgilgen, tuıaqtary ótkir, múıizi salaly. Janýardyń basy tik kóterilgen. Zerger asha tuıaqty ańnyń músinin jasap qana qoıǵan joq, minezin de bere bilgen. Kerbez. Múıizderi artqa qaraı qısaıǵan, basy kóterińki. Shaǵyn ǵana músinniń ózi dınamıkalyq sıpatta jasalǵan. Kózderin kógildir taspen kómkergen. Kózderin ǵana emes, denesi, tuıaqtary da baǵaly taspen zerlenipti. Alaıda olar bútin saqtalmaǵan eken. Iyǵyndaǵy tamshy tárizdes oryndaǵy tas túp ornymen joq. Al synyqtaryn zerttegen mamandar kógildir tasty lazýlı dep tapqan. Shaǵyn ǵana músinge úńile qarasańyz, denesinde, moınynda jáne bet súıeginde ilmekter bar.
Sonymen qatar múıizdi buǵynyń janynan jeti birdeı maral músini tabylǵan. Áshekeı buıym retinde jasalǵan bul músinderdiń de aıaqtary búgilgen, moıyndar tik kóterilgen. Degenmen, árbir buǵy fıgýrasynda aıyrmashylyq bar. Beınelengen maraldardyń da kózderi, qulaqtary túrli-tústi tastarmen kómkerilgen. Biraq bári birdeı saqtalmaǵan.
Fıgýralardan fılosofııalyq oı túıetin bolsaq, ejelgi sheber patshaıymnyń o dúnıede paıdalanady-aý degen jaýyngerlik jabdyqtarynyń betin bezendirý úshin buǵy-maral fıgýralaryn paıdalanǵan. Tuıaqty janýarlardy qasıet tutsa kerek. Aıta keteıik, bizdiń zamanymyzǵa deıingi VIII ǵasyrǵa jatatyn bul fıgýralar Shilikti jazyǵyndaǵy qorǵandardan da tabylǵan.
Shyǵys Qazaqstan oblysy
