Foto: freepik.com
О́tken aptada Ǵylym jáne joǵary bilim mınıstri Saıasat Nurbek Atyraý oblysyna jumys saparymen baryp, tótenshe jaǵdaılar jónindegi oblystyq jedel shtabta jumys istep jatqan óńir ǵalymdarymen kezdesti. Munda ǵalymdar aǵyn jyldamdyǵynyń jıiligin kórsetip, bógetterdi nyǵaıtýǵa arnalǵan núkteler men olardyń sý aǵysyna, tolqynyna tótep berý týraly esebimen tanystyrdy.
Jaıyq ózeni kóleminiń matematıkalyq modeldeýine aımaqtaǵy joǵary oqý oryndarynyń ǵylymı kúshi jumyldyrylǵan. Olardyń arasynda tájirıbeli matematık, fızık, mehanık, gıdrogeolog, geologııa ınjeneri, ekolog, hımık, geodezıst-ınjener mamandar bar. Olar Atyraýda sý deńgeıin kún saıyn eseptep otyr.
Jedel shtab otyrysynda ǵalymdarmen kezdesken mınıstr S.Nurbek: «Eń aldymen qazirgi ýaqytta mol aǵynnyń kelý ýaqyty men kólemin boljamdy esepteýimiz qajet. Bul maqsatta H.Dosmuhamedov atyndaǵy Atyraý ýnıversıteti men S.О́tebaev atyndaǵy Atyraý munaı jáne gaz ýnıversıtetine Atyraý oblysynyń tótenshe jaǵdaılar shtabyna tartylǵan ǵalymdar sanyn kóbeıtýdi, jedel esepteýler júrgizýge ǵalymdarǵa qajetti jaǵdaı jasaýdy tapsyramyn. Osyndaı syn saǵatta ǵalymdarymyzǵa aıryqsha mindet júkteledi», dedi.
Osy otyrysta mınıstr S.Nurbek H.Dosmuhamedov atyndaǵy Atyraý ýnıversıtetinde sý salasy mamandaryn daıarlaý máselesin zerdeleý qajettigin atap ótti. Sonymen qatar jedel shtabtyń ǵylymı sektor jumysyna elimizdegi bilikti ǵalymdardy shaqyrýdy tapsyrdy. Sol tapsyrma aıasynda Ál-Farabı atyndaǵy Qazaq ulttyq ýnıversıteti, Q.Sátbaev atyndaǵy Qazaq ulttyq tehnıkalyq zertteý ýnıversıteti, M.Dýlatı atyndaǵy Taraz óńirlik ýnıversıteti, Gıdrogeologııa jáne geoekologııa ınstıtýty, Geografııa jáne sý qaýipsizdigi ınstıtýtynyń mamandary Atyraýǵa kelip, jedel shtabtaǵy ǵalymdar qataryn tolyqtyrdy. Gıdrogeologııa, geodezııa jáne kartografııa, gıdrotehnıka boıynsha jetekshi ǵylymı qyzmetkerler men professorlar qazirgi sý tasqyny jaǵdaıyn ǵylymı turǵydan túsindirip jatyr.
Osy oraıda Tótenshe jaǵdaılar jónindegi oblystyq jedel shtabtyń ǵylymı sektory músheleriniń sý tasqyny qaýpi týraly pikirlerin usynyp otyrmyz.
Esengeldi ARYSTANALIEV,
S.О́tebaev atyndaǵy Atyraý munaı jáne gaz ýnıversıtetiniń dosenti, tehnıka ǵylymdarynyń kandıdaty:
– Qazir eldegi kúrdeli jaǵdaıǵa baılanysty bári bir baǵytta, sheshimdi tabatyn jolda kúsh biriktirip otyrmyz. Basshylyqqa alatynymyz – sonaý 1942 jylǵy, 1954 jylǵy, odan beri qaraı 1997 jylǵy jáne 2005 jylǵy sý máselesindegi oqıǵalardyń nátıjeleri. Osy aqparattardy búgingi tańda Atyraý oblysy men Atyraý qalasyndaǵy sý máselelerin sheshýde paıdalanýdamyz. Bul aqparattarǵa súıensek, qazir atqarylyp jatqan jumys qalamyzdy sý tasqynynan saqtap qalýǵa yqpal ete alady. Desek te qosymsha jumystyń atqarylýyn, sonyń ishinde júıeli esepteýlerdiń júrgizýdi, soǵan baılanysty sheshimder qabyldaýdy jedeldetý kerek. Qazirgi tańda Atyraý qalasyndaǵy sý resýrsynyń múmkindigin, halyqqa paıdalaný jaǵdaıyndaǵy tıimdiligin esepteýimiz qajet. Áleýmettik-ekologııalyq, keri áserlerin qarastyrǵanymyz jón. Sonymen qatar jalpy jasalatyn keshendi monıtorıng, barlyq eldegi bolyp jatqan jaǵdaılardyń bizdiń óńirlerge, elimizge áserin zerttegen abzal.
Qasıet QARATAEVA,
ýnıversıtet professory, fızıka-matematıka ǵylymdarynyń kandıdaty:
– Biz, Atyraý munaı jáne gaz ýnıversıtetiniń ǵalymdary basqa da zertteýshilermen, mamandarmen birigip sý tasqynynan Atyraý qalasyn qutqarý boıynsha ártúrli esepteýler júrgizip, jobalarymyzdy usynamyz. Jobalarymyzda qajetti, túrli esepteýlerge kerekti málimetterdi alýǵa jan-jaqty qoldaý kórsetilip otyr. Atyraý qalasyn sý tasqynynan saqtap qalýǵa úlken kúsh jumyldyrylyp, birlese jumys atqarylýda.
Serik BORANOV,
táýelsiz sarapshy, ekolog:
– Shtabta ǵylymı top quramy jasaqtalǵan. Jaıyq ózeni alabynyń jaǵdaıyn zerteý boıynsha qajetti jabdyqtar qamtamasyz etilgen. Búkil elimizden kelgen ǵylymı top jasalǵan jaǵdaıdyń kómegimen sý tasqyny qaýpin, ony boldyrmaý joldaryn zerdelep jatyr.
