Halyqaralyq qaýipsizdik máselesi qozǵaldy

Reseıdiń Qaýipsizdik keńesi uıym­dastyrǵan is-sharada qaýipsizdik keńes­­teriniń hatshylary, ulttyq qaýip­sizdik jónindegi keńesshiler, álemniń 106 eliniń quqyq qorǵaý jáne arnaıy organdarynyń, qorǵanys vedomstvo­larynyń basshylary, sondaı-aq ShYU, UQShU, TMD, AО́SShK, ASEAN, EAEO, Arab memleketteri lıgasy sııaqty halyq­aralyq uıymdardyń jetekshileri men ókilderi bas qosty.

Plenarlyq otyrysta polıortalyqqa negizdelgen álemdik jaǵdaı qalyptastyrý jáne halyqaralyq qaýipsizdiktiń, beıbit­shilik pen turaqtylyqtyń ajyramas bóligi sanalatyn ulttyq biregeılikti saqtaı otyryp, aqparattyq qaýipsizdikti qamtamasyz etý máseleleri qarastyryldy.

Sonymen qatar jıynǵa qatysýshylar zańsyz kóshi-qonǵa qarsy turý jáne áskerı qaqtyǵystar, tabıǵat apaty men tehnogendik sıpattaǵy tótenshe jaǵdaılar kezinde halyqty qorǵaý salalaryndaǵy halyqaralyq yntymaqtastyq máselelerin talqylady.

Qazaqstan Respýblıkasy Qaýipsizdik keńesiniń hatshysy óz sózinde kıberqaýip­sizdikke tónetin qaterdiń artqanyn, sonyń ishinde aqparattyq-kommýnıkasııalyq tehno­logııalar ekstremıstik jáne terro­rıs­tik toptardyń negizgi quralynyń biri­ne aınalǵanyn atap ótti. Osy oraıda Ǵızat Nurdáýletov Halyqaralyq aqparattyq qaýipsizdiktiń jańa arhıtektýrasyn qurý qajettigine nazar aýdardy. Bul rette atalǵan arhıtektýra teń quqylyq, senim, ashyqtyq qaǵıdattary negizinde jáne barlyq eldiń múddesin eskere otyryp, BUU aıasynda qurylýǵa tıis.

Forým aıasynda Qazaqstan Respýb­lıkasy Qaýipsizdik keńesiniń hatshysy birqatar sheteldik áriptesimen kelissózder júrgizip, ekijaqty yqpaldastyq máse­lelerin qarastyrdy.