Foto: Pixabay / TheDigitalWay
2024 jyldyń 25 sáýirinde Astana qalasynyń qylmystyq ister jónindegi mamandandyrylǵan aýdanaralyq soty uıymdasqan qylmystyq top qurǵan jáne oǵan basshylyq jasaǵan, sondaı-aq aldaý nemese adam senimin teris paıdalaný jolymen múliktik zalal keltirgen, laýazymdyq ókilettikterin teris paıdalanǵan, jalǵan qujattardy qoldan jasaǵan aıyptalýshylardyń isin qarady.
Sottalýshylarǵa tıisti alymdar men tólemderdi ótemeı, memleketke zalal keltirý, sonymen qatar HQKO men QR IIM ıntegrasııalanǵan aqparattyq júıesine kólik quraldarynyń málimetteri jáne avtokólikterdi satyp alý-satý boıynsha júrgizilgen mámileler týraly kórineý jalǵan aqparat engizý arqyly shetelden ákelingen avtokólik quraldaryn jappaı tirkeýdi uıymdastyrdy degen aıyp taǵyldy.
Uıymdasqan qylmystyq top músheleriniń árqaısysynyń kelisilgen áreketteriniń nátıjesinde 2021 jyldyń jeltoqsanynan bastap 2022 jyldyń mamyryna deıin 312 kólik zańsyz tirkelgen. Sondaı-aq qylmyskerler taǵy 150 kólik quralyn zańsyz tirkep, onyń ishinde róli oń jaqta ornalasqan 73 avtokólik el aýmaǵyna is júzinde jetkizilmegeni anyqtaldy. Uıymdasqan qylmystyq toptyń 3 basshysy qylmystyq top quryp, laýazymdyq ókilettikterin paıdalana otyryp, topty basqarǵan. 5 adamnan turatyn uıymdasqan qylmystyq top qatysýshylary mámilelerge qatysyp, aqshalaı qarajattyń bir bóligin alyp otyrǵan.
Al 17 deldal Telegram-chattardan satyp alý arqyly avtokólikterdi resimdeýge qatysyp, avtokólikterge qujattardy qaıtadan satyp jiberip otyrǵan.
Aıyptalýshylar arasynda polısııa qyzmetkerleri de ber. Olar urlyq belgileri bolmaǵan kezde aldaý nemese senimge qııanat jasaý arqyly múliktik zııan keltirip, laýazymdyq ókilettikterin asyra silte paıdalanyp, óz maqsattaryn iske asyrǵan.
Sotta aıyptalýshylar kinásin moıyndamady. Olardyń kinási kýágerlerdiń aıǵaqtarymen, saraptamalardyń qorytyndylarymen, jasyryn tergeý áreketteriniń nátıjesi men qylmystyq istiń basqa da materıaldarymen dáleldendi.
