KIA kelse, óndiristiń «kıesi» artar...

Asa mańyzdy halyqaralyq jobanyń jumysymen tanysý maqsatynda elimizge arnaıy kelgen «Kia Corporation» basshysy Ho Sýn Son Astanaǵa az kún aıaldap, Prezıdent Qasym-Jomart Toqaevtyń qabyldaýynda boldy. Korporasııa basshysy Prezıdentke Tobyl óńirinde salynyp jatqan tolyq sıkldi zaýyt qurylysynyń barysyn baıandap, munyń syrtynda,  avtomobıl bólshekterin álemdik deńgeıde óndirip jatqan iri kompanııalardy elimizge tartý jumystary júrgizilip jatqanyn jetkizdi. Nátı­je­sinde, elimizde avtokólik bólshek­terin shyǵaratyn zaýyt salý jóninde kelisimge qol qoıylǵan. Prezıdent «KIA» korporasııasynyń sheshimin quptap, avtoındýstrııa­ny damytý elimizdiń ónerkásip saıasatynyń negizgi baǵyttarynyń biri ekenin, bul salany damytý úshin bilikti otandyq mamandardy daıarlaý máselesi de es­ke­rilýi kerek ekenin aıtqan.

Astanadan keıin Qostanaıǵa at basyn tiregen «Kia Corporation» prezıdenti oblys ákimi Qumar Aqsa­qalovpen kezdesip, jańa zaýyt­tyń qurylysymen tanysty. Kezdesý barysynda jobanyń Qazaqstan men Ońtústik Koreıa arasyndaǵy yn­tymaqtastyqty odan ári nyǵaı­typ, eki el ekonomıkasynyń damýy­na tyń serpin beretini aıtyldy. Son­­daı-aq jańa zaýyt halyqaralyq na­ryq­ta bási joǵary «Kia» brendiniń Qa­­zaqstan men TMD naryǵynda keń ta­ralýyna yqpal etetin bolady.

«Kia Corporation» prezıdentiniń aıtýynsha, Orta Azııa men TMD el­derinde avtomobıl naryǵyn damy­týda Qostanaı qalasy sheshýshi yqpal ete alady. Mundaı múmkin­dikke Qostanaıda damyǵan kólik ınfra­qurylymynyń bolýy men toǵyz joldyń torabynda ornalas­qan shahardyń geografııalyq jaǵ­daıy­nyń tıimdiligi negiz bola alady. Osynaý kózir múmkindik Qostanaıdy avtomobıl óndirisi men eksport ortalyǵyna aınaldyrýǵa tıis.

Jergilikti atqarýshy bılik «KIA» zaýytyna Qostanaıdyń sol­tús­tik-batysyndaǵy ın­dýs­trııa­lyq aı­maqtan 70 gektar jer telimin bó­lip bergen.  Qazir munda qurylys-mo­n­tajdaý jumystary qyzý júrip jatyr. Qada qaǵý jumystary aıaq­ta­lyp keledi. Kúzge salym 98 myń sharshy metrlik ǵımarattyń qurylysy bas­talmaq. Sheteldik kompanııa memleket tarapynan da úlken qoldaýǵa ıe.

Qostanaı oblysynyń ákimi Qumar Aqsaqalov jobany júzege asyrý barysynda adam kapıtalyna erekshe nazar aýdarylatynyn atap ótti. Ákimniń aıtýynsha, «KIA» zaýytyn qajetti mamandarmen qamtamasyz etý maqsatynda óńirlik kolledjder men joǵary oqý oryndarynda mashına jasaýdyń 5 baǵyty boıynsha jańa mamandyqtar ashylady. Olardyń ishinde mashına jasaý tehnologııasy, avtomattandyrý jáne basqarý, mashınalar men jabdyqtardy paıdalaný jáne tehnıkalyq qyzmet kórsetý, qara metall óńdeý, dánekerleý táriz­di mamandyq túrleri bar. Bul maman­dyqtardy ıgeretin stýdent-jas­tardyń bilim-tájirıbesin ushtastyrý maqsatynda óńirdegi birneshe oqý ornyn materıaldyq-tehnıkalyq turǵydan jan-jaqty jabdyqtaý jumystary qolǵa alynyp jatyr.

Investorlar eń aldymen ón­di­ris­ke qolaıly ınfraqurylymnyń bar-joǵyna qaraıtyny belgili. Son­­dyqtan jobany oıdaǵydaı iske asyrý maqsatynda zaýyt­qa bó­lin­gen jer aýmaǵyn ınjenerlik-kom­mýnıkasııalyq ınfraqurylymmen qam­tamasyz etý baǵytynda da aýqym­­dy jumys atqarylyp jatyr. Atap aıtqanda, elektr, gaz, sý já­ne káriz jelileri, sondaı-aq syrtqy jaryq­tandyrý, baılanys jeli­lerin tartý tárizdi ınjenerlik kommý­nı­ka­sııa­lardyń tolyq keshenin salý jos­parlanyp otyr. 

Jańa zaýytty qajetti shıkizatpen qamtamasyz etý, daıyn ónimdi úzdiksiz tasymaldaý maqsatynda uzyndyǵy 4,2 shaqyrym kireberis tasjol jáne tek zaýyt qajetine ǵana paıdalanylatyn 5 shaqyrymdyq temirjol torabyn salý kózdelgen. 

Qostanaı oblysy