Sýretterde: 1.Máken Imanova. 2.Q.Sátbaev mýzeı-úıiniń meńgerýshisi Ahmedııa Jumabaev Amangeldi Imanovtyń qyzy Máken Imanovany mýzeıde qarsy alyp tur. 1969 jyl. 11 sáýir.
Qanysh Sátbaev Almatyǵa qonys aýdarǵan soń bul úıde mekteptiń qarapaıym muǵalimi Ahmedııa Jumabaev degen kisi turypty.
Akademıktiń Qarsaqbaıdaǵy Mýzeı-úıiniń ashylýyna bar ynta-jigerin jumsaǵan osy – Ahmedııa Jumabaev. Ol 1905 jyly Jambyl oblysy, Baıqadam aýylynda dúnıege kelgen. 1928-1932 jyldary Abaı atyndaǵy memlekettik pedagogıkalyq jáne muǵalimder ınstıtýtynda joǵary bilim alǵan. 1960 jyly Qarsaqbaıdaǵy №1 orta mektepke hımııa, bıologııa pániniń muǵalimi bolyp ornalasqan. 1978 jyly ómirden ótken.
Ol Baıanaýylǵa, Almatyǵa, Tomskige arnaıy baryp, ǵalymǵa qatysty jádigerlerdi jınaqtaıdy. Sóıtip, 1969 jylǵy 11 sáýirde Qarsaqbaıda Qanysh Sátbaevtyń mýzeıi ashylady. Bul elimizdegi Qanekeńe arnalǵan alǵashqy mýzeı edi. A.Jumabaev mýzeı ashylǵannan bastap ómiriniń sońyna deıin meńgerýshi, qor saqtaýshy ,kúzetshi, baǵban ári ekskýrsovod qyzmetterin bir ózi atqarǵan.
Mýzeıdiń ashylý saltanatyna Ult-azattyq kóterilisiniń batyry Amangeldi Imanovtyń qyzy Máken Imanova qurmetti qonaq retinde shaqyrylǵan eken.
Bıyl uıymdastyrylǵanyna 55 jyl tolǵan mýzeıde elimizge tanymal kóptegen tulǵa qonaq bolǵan, «Qurmetti qonaqtar» kitabyna qoltańbalaryn qaldyrǵan. Qazaq óndirisiniń qarashańyraǵy Qarsaqbaıǵa joly túskenderdiń eshqaısysy da Qanekeńniń tabanynyń izi qalǵan Mýzeı-úıine soqpaı ketpeıdi.
Ulytaý oblysy,
Qarsaqbaı kenti
