Oqıǵa Aqtóbede 2018 jyldyń 16 sáýirinde bolǵan. Rysqalı jumystan úıine bara jatqan kezde Mahambet kóshesindegi turǵyn úılerdiń birinde tómengi qabattaǵy terezeniń birinen qoıý tútin shyǵyp jatqanyn kórgen. Áskerı qyzmetker oılanbastan úıdiń ishindegi adamdardy qutqarý úshin janyp jatqan páterdiń ishine qoıyp ketedi.
«Keshki saǵat alty jarymda jumystan shyǵyp, úıge bara jatqan edim. Bul jerden kúnde ótemin. Sol kúni úı jaqtan qalyń tútin shyǵyp jatqan turǵyn úıdi baıqadym. Jaqyndaı bergende «Kómektesińder!» degen daýysty estidim. Oılanbastan daýys shyqqan jaqqa qaraı júgirdim. Eki qabatty úıden tútin shyǵyp jatty. Kórshiler páterlerdiń birinde múgedektigi bar adam men egde jastaǵy áıel bar ekenin aıtyp úlgerdi. Júgirip bara jatyp taǵy bir er adamnyń ekinshi qabatta qalǵan balalaryna kómektesýin surady. Olardy tereze arqyly túsirdik. Barlyǵy bolǵan oqıǵadan qorqyp qalǵan eken. Abyroı bolǵanda, adamdardy qaýip qushaǵynan shyǵaryp úlgerdik. Mundaı syn sátte kez kelgen adam meniń áreketimdi oryndaǵan, qaıtalaǵan bolar edi», deıdi R.Eńsepbaev.
О́z ómirin qaýip-qaterge tikken leıtenant janyp jatqan úıden egde jastaǵy eki adam men 2-4 jastaǵy balalardy da alyp shyqqan. «Tútindi kórgen boıda ondaǵy adamdardyń amandyǵyn ǵana oıladym. Kórshiler ýaqtyly órt sóndirýshi qyzmetkerlerin shaqyrdy. Basqa adamdar da úılerinen shyǵyp úlgerdi. Men bul is-áreketimnen eshqandaı erlik kórip turǵan joqpyn», deıdi keıipkerimiz.
Degenmen efreıtor Rysqalı Eńsepbaev antyna adaldyǵy úshin Prezıdenttiń Jarlyǵymen «Erligi úshin» tósbelgisimen marapattalyp, joǵary basshylyqtyń qoldaýymen áskerı bólimde kadr bólimshesiniń basshysy laýazymyna taǵaıyndaldy. Al jaqynda alǵashqy «leıtenant» áskerı shenine qol jetkizdi. «Bul oqıǵa ómirimdi túbegeıli ózgertti desem bolady. Osydan keıin aǵaıyn-týys, qarýlas dostar men áriptester arasynda syı-qurmetim ósti. Ofıser atandym, otbasymda da barlyǵy oıdaǵydaı. Marapat úshin emes, ózimiz ulandyq bolǵan soń boryshymyzdy atqaramyz. Bul – bizdiń ómirlik tańdaýymyz. Sý tasqyny bolsyn, órt bolsyn, el ishinde qandaı oqıǵa bolsyn, biz kómekke kelýge daıynbyz», deıdi aǵynan jarylǵan Rysqalı. Ata-babamyz «jaqsylyq ekken alǵys orady» dep osyndaıda aıtsa kerek-ti.
