Dostyq úıleri – eldiktiń nyshany

Apat aıtyp kelmeıdi. Bıylǵy sý tasqyny bárimizdi ábigerge salyp, jos­parymyzdy ózgertti. Dostyq úıleri de úırenshikti jumysyn sý apatymen kúresýge baǵyttady. Syn saǵatta otan­dastarymyzdyń aýyzbirshiligine taǵy da rıza boldym. Olar eshkim aıt­qyz­bastan, qarapaıym azamattardan bastap, úlken-kishi demeı Dostyq úılerine azyq-túlik, dári-dármek, turmystyq zattar ákelip jatyr. Sóıtip, Dostyq úıleri «Júrekten – júrekke!» aksııasynyń alańy men gýmanıtarlyq kómek jınaýdyń shtabyna aınaldy. Qazir biz táýlik boıy jumys istep jatyrmyz.

Assambleıanyń Dostyq úıleri – biregeı brend. Ol búginde – elimizdiń 34 qala­syndaǵy tutas jeli. Búkil qoǵam­men birge biz de ózgerip jatyrmyz. Birinshiden, biz 24/7 rejiminde keńselerde, kabınetterde qamalyp otyrmaı, sharýashylyq, is basynda bolyp, adamdarmen tikeleı jumys isteımiz. Ulttyq quryltaı men Qazaq­stan halqy Assambleıasynyń qundy­lyq­taryn nasıhattaımyz.

Ekinshiden, keshegi sessııada áleý­met­tik nysandardy salý qajettigi aıtyldy. Solardyń ishinde kópultty eldi mekenderde Dostyq úıleri bolsa, quba-qup. Bul – óte mańyzdy. Qanat­qaqty joba retinde shalǵaı eldi mekenderde jumys isteýge arnalǵan kóshpeli Dostyq úıleriniń formatyn synaqtan ótkizip jatyrmyz.

Úshinshiden, Dostyq úıleri ártúrli jastaǵy jáne áleýmettik toptaǵy azamattardy tartý ortalyǵyna aınaldy. Mysaly, bizdiń Dostyq úıimizde erekshe balalarǵa arnalǵan sabaqtar, belsendi uzaq ómir súrý klýbtary, áleýmettik baǵyttaǵy zańgerlik keńester bar. Sondaı-aq, munda kez kelgen adam memlekettik jáne basqa tilderdi tegin meńgere alady.

Qazaq tiliniń qoldanys aıasyn ke­ńeıtý – Assambleıanyń basty basym­dyǵy, ony barsha etnos ókilderi qoldaı­dy, qýattaıdy. Etnostyq toptar arasynda qazaq tilinde sóılep qana qoımaı, sol tilde óleń jazý, áńgime qurastyrý qalypty jaǵdaıǵa aınaldy.

Qazaqstan – kópmádenıetti jáne kóptildi memleket. Bul – bizdiń erekshe artyqshylyǵymyz. Biz memle­ket­tik jáne orys tilderinde, sondaı-aq etnos­tar tilderinde sóıleı­miz. Al til bilýde, úı­renýde tek artyq­shy­lyqtardy kórip, baǵa­lap, jańa múm­kin­dikter tabý kerek.

Bıyl Prezıdent Q.Toqaevtyń tapsyrmasymen túrki áleminiń astanasy – kıeli Túrkistanda zamanaýı Dostyq úıi ashylady. Bul jerde alýan túrli má­denıettiń ortalyǵyna aınalady dep úmit­tenemiz.

Rýfına ÝSANOVA,

Jetisý oblysy Dostyq úıiniń dırektory