Manchjýr jańǵaǵy, sibir almasy, ýssýrı almurty, jabaıy shıe aǵashtary sekildi 140-qa jýyq kóshetter ýnıversıtet saıabaǵynyń sáni bolmaq.
NU Prezıdentiniń keńesshisi Qanat Baıǵarınniń aıtýynsha, joǵary oqý ornynyń bul saıabaǵyna tek stýdentter ǵana emes, elorda turǵyndary da bara alady.
«Biz kampýstyń shamamen 40 paıyzyn qala turǵyndaryna arnap ashýdy josparlap otyrmyz. Elorda ákimdigi kelisip, qoldaý bildirse, ýnıversıtet aýmaǵynda jasyl saıabaq boı kóteredi. Búgin klımattyq jaǵdaılarymyzǵa tózimdi kóshetterdi ektik. Osyǵan baılanysty biz Ulttyq bıotehnologııa ortalyǵymen jáne basqa uıymdarmen seriktestikte jumys isteımiz. Mysaly, sakýra sortynyń 14 shıe kóshetterin ýnıversıtetke «Turaqty damý» Jer Qory jastar birlestigi bergen edi. Bul senbilik – bir rettik oqıǵa emes, keleshekte aǵash egip, qalany abattandyrý boıynsha birneshe aksııa ótkiziledi», dedi Qanat Baıǵarın.
Atalǵan oqý ornynyń negizi qalanǵan sátten bastap ekologııalyq mádenıetti qalyptastyrý maqsatynda túrli is-sharalar ótkizilip keledi. Kampýsty jasyldandyrý, qaıta óńdeý jáne jańartylatyn energııa bastamalary ýnıversıtette jáne odan tys jerlerde júzege asyrylady. Búgingi tańda ǵımarattardyń energııa tıimdiligin arttyrýǵa, qaldyqtardy bólek jınaýǵa, bıo ártúrlilikti qoldaýǵa baǵyttalǵan 70-ke jýyq stýdenttik joba jumys istep jatyr. Q.Baıǵarınniń aıtýynsha, atalǵan jobalar shaǵyn kólemde bolsa da, kúndelikti jáne áleýmettik máselelerdi sheshýge kómektesedi.
«Biz tek kampýsta ǵana emes, elimizdiń 12 joǵary oqý ornymen birlesip jumys isteımiz. Ýnıversıtet elimizde qolaıly ekologııalyq orta qalyptastyrýǵa baǵyttalǵan bastamalardy júzege asyryp keledi. Sonyń ishinde bólek qaldyqtardy jınaý pýnktterin damytý, parnıktik gazdar shyǵaryndylaryn azaıtý, kampýstyń energııa tıimdiligin arttyrý jáne taǵy basqa jobalar boıynsha elimizdegi stýdentterdiń jobalaryn qoldap, óz tájirıbesin bólisip keledi. 2010 jyldan bastap kampýsta jańartylatyn energııa synaq alańy jumys isteıdi. Qazirgi tańda ǵalymdar ekologııa baǵytynda jáne jańartylatyn energııa kózderi salasynda túrli zertteýler júrgizip jatyr. Jýyrda ótken Prezıdent janyndaǵy Ǵylym jáne tehnologııalar jónindegi keńes otyrysynda qabyldanǵan sheshimderdiń jartysy klımattyq, ekologııalyq máselelerge qatysty boldy. Bizdiń mindetimiz – ýnıversıtettiń áleýetin naqty ekonomıkanyń ózekti máselelerin sheshýge baǵyttaý», dedi Q.Baıǵarın.
Ýnıversıtettiń ókilderi atap ótkendeı, «Taza Qazaqstan» respýblıkalyq aksııasyna qatysý – elimizdiń jáne álem aldynda turǵan ekologııalyq máselelerdi, sonyń ishinde óńirlerdegi sý tasqynynyń saldaryn sheshýge degen qulshynysynyń kórinisi. Buǵan deıin ýnıversıtet basshylyǵy men ujymy sý tasqynynan zardap shekken azamattarǵa qol ushyn sozý maqsatynda birneshe jumys atqardy. Máselen, Qostanaı oblysyna birinshi kezektegi qajetti zattardy jóneltken edi. Sondaı-aq stýdenttik uıymdar da qaıyrymdylyq naýqanyna qosylyp, eriktiler qarajat jınap, sý tasqynynan zardap shekkenderge shama-sharqynsha qoldaý kórsetti. «Taza Qazaqstan» respýblıkalyq aksııasy aıasynda bilim alýshylar jaramsyz materıaldardy jınap, qaıta óńdeýge jiberdi. Sondaı-aq plastıkalyq bótelkeler, konteınerler, qaǵaz jáne kartondar da ekokásipkerlerge jóneltilip, kıimder men oıynshyqtar qaıyrymdylyq qoryna berildi.
