Árdaıym qorshaǵan ortany qorǵaý úderisterimen baılanysta bolýdy bildiretin ploggıng – álemdik tájirıbede jastar arasynda tanymal is-shara. S.Qojanov saıabaǵynda ótken marafonǵa qaladaǵy orta arnaýly oqý oryndarynyń stýdentterinen qurylǵan 5 komanda ózderine tıesili aýmaqtardy júgirip ótý arqyly qoqys jınaýdan jarysqa qatysty. Bir saǵatta saıabaqtan 52 qap qoqys jınaldy. Uıymdastyrýshylar bul is-shara salaýatty ómir saltyn ustaný men tabıǵatqa degen qamqorlyqtyń tamasha úılesimdiligi ekenin aıtady. Jarys nátıjesinde jeńimpaz atanǵan komandalar Alǵyshattarmen marapattaldy.
Al Arys qalasynda áskerıler ıgi iske atsalysyp, jol boıyndaǵy kólik qozǵalysyna jáne jolaýshylarǵa qaýip týdyratyn aǵashtardy sanıtarlyq kesý, aǵash butaqtaryn jınaý jumystaryn jumyla atqardy. «Bul aksııany tek memlekettik qyzmetkerler nemese áskerı qyzmetshiler ǵana emes, otandastar bolyp qoldaýymyz qajet», deıdi sarbazdar.
Ekologııalyq aksııanyń «Jasyl aımaq» aptalyǵynda Maqtaaral aýdanynyń ortalyǵy Myrzakentte 10 myń túp gúl kósheti egildi. «Táýelsizdiktiń 30 jyldyǵy» saıabaǵy men «Jastar» gúlzaryna, S.Jashtaev pen S.Qojanov kóshelerine otyrǵyzylǵan kóshetterdiń ishinde gúlderdiń raýshan, salvııa, pıtýnııa atty túrleri bar. Gúl kóshetteri arnaıy Saryaǵash, Qazyǵurt aýdandarynan ákelingen. Aýdan ortalyǵynda ornalasqan birqatar kásipkerlik mekeme de óz aýlalaryna kógaldandyrý jumystaryn júrgizdi.
Bıyl Túrkistan oblysynda jalpy 1 mıllıonnan asa túrli kóshet egý josparlanǵan. Onyń jartysy kóktem aılarynda, qalǵany kúzde egilmek. «Jasyl aımaq» aptalyǵynda óńirdiń barlyq eldi mekeninde tazalaý, ákteý, syrlaý, kóshet egý, aǵash butalaý, túpterin qopsytý, sýarý júıelerin retteý, qorshaýlaryn qalpyna keltirý jumystary júrgizildi. Al «Kıeli meken» aptalyǵy kezinde oblys kóleminde 22 myńnan asa azamat tazalyq jumystaryna atsalysyp, 496 tehnıka tartylǵan. Nátıjesinde, oblystaǵy 1 410 kósheniń boıy tazalanyp, 7 816 dana aǵash otyrǵyzyldy. 16 508 dana aǵash áktelip, 40 024 sharshy metr aıaqjoldar tazalandy. Sondaı-aq 346 saıabaq pen gúlzar, 244 balalar jáne sport alańshasy retke keltirildi. 176 shaqyrym kópir, ózen-kanaldar men bulaqtardyń arnasy, 517 kópqabatty turǵyn úı aýmaǵy men aýlasy, jertólesi tazalandy.
Túrkistan oblysy
