Foto: ru.sputnik.kz
«Er etigimen sý keshken» bul kúnde qutqarýshylar men Sý resýrstary jáne ırrıgasııa mınıstrligi ókilderi, Kólik mınıstrligi ókilderi, jergilikti ákimder janynda eńbekke qulshynǵan erikti jastar, áskerıler, eldi mekenderdi ury-qarydan qorǵaǵan polısııalar, halyqqa dem berýshi Parlament depýtattary t.b. júr. Aýyzbirlikke súısindik, qýandyq!
Sýda qalǵan otandastarymyzǵa eldiń túkpir-túkpirinen jiberilip jatqan gýmanıtarlyq kómekterdi, ásirese «...osydan basqa eshteńem bolmaı tur» dep úıinde turǵan bir kılogramm kúrishine deıin ákelgen ájeıdiń...» («Myń bolǵyr Márııa», «Egemen Qazaqstan», 19.04.2024.) kórip-bilip, qartaıǵanda erik bermeıtin, borkemik kóńil, ishki qýanyshty janarda kilkitip qana qoımaı, qolǵa qalam da aldyrdy.
Aınalaıyn, bárińnen, aınalaıyn!
Aınalaıyn, qazaǵym, aımaq-aıym!
El basyna osyndaı kún týǵanda,
Qarttardy qoıar ma eken, jaıǵa ýaıym.
Mundaıda kete almassyń elden erek,
Syn saǵatty kári-jas bári kóret.
Qolda baryn berip tur kári ájeı de,
Tar ótkelde arqanǵa jip te kómek.
Birligińdi, peıilińdi kórdim, elim,
Jınaǵan bir kindikke etek-jeńin.
Baıandy bolashaqqa kózim jetti,
Otarǵa aınalmasqa artty senim.
Bir bolyńdar, árqashan bólinbeńder,
Ol-bul dep, bir-birińnen jerinbeńder.
Qazaq eli – qazaqqa jalǵyz Otan,
Al meniń «El!» dep júrgen elim – sender!
Bir bolyńdar, birigińder, elim! Danalarymyz «Kúsh – birlikte!» degen. Prezıdentimiz eki sóziniń birinde, sondaı-aq osy bıyl qańtar aıynda bas gazetimiz «Egemen Qazaqstan»-ǵa bergen suhbatynda da, tipti tutqıyldan sý kelgen 28 naýryzdan bergi jerde de eldi tek birlikke shaqyryp otyr.
Dinı qundylyqtarymyzda, qasıetti Quran Kárimde basshyny syılaýdy tapsyrǵan. Al mundaı tapsyrmany oryndaǵan eldi Alla jaqsy kóredi. Sol úshin Prezıdent tóńiregine birigý shart.
Basynan talaı almaǵaıyp zamandy ótkergen halyq «Jut jeti aǵaıyndy» dep aıtyp ketken. Sol jeti aǵaıyndynyń biri, eń jamany – alaýyzdyq. Quranda qashanda túzeýshiden buzýshy kóp bolatynyn eskertken. Bizdiń aramyzda da túzeýshiden buzýshy kóbi – qyzyl buryshtyń ashylyǵyndaı shyndyq.
«Qazaqstan» telearnasyndaǵy «Ashyq alańda» Parlament Májilisiniń depýtaty sý basqan jerge bir buzyqtar baryp, eriktilerge: «Munda neǵyp júrsińder? Muny Úkimet isteýi kerek! Senderdiki ne?..», dep aıtyp júrgenin dáıektedi. Bular – elbuzarlar. Ondaı qara nıetti buzyqtarǵa qulaq salýdyń ózi uıat. Olar qashanda azǵyrýshy, eldiń kózine ózderin otanshyl, janashyr kórsetip, ıgilerdi izgilikten qaıtaryp, birlikti iritedi de, el basyna kún týǵanda jerdiń «astyna kirip» ketedi de, joǵalady.
Sondyqtan ondaı pysyqtardan aýlaq júrip, Prezıdent úndeýine birigeıik. Sonda árqandaı salmaqty da, synaqty da jeńemiz. Eldigimizdi saqtap qalamyz jáne ulttyǵymyzdy dáleldeımiz.
Narbaı TAǴAIULY,
qart jýrnalıst
Qaraǵandy oblysy,
Saran qalasy
