Foto: leto.clinic
Quryltaıda qoǵamnyń birligin nyǵaıtý, ulttyq qundylyqtardy damytý máseleleri talqylandy. Munyń el birligine, memlekettiń turaqtylyǵyna tıgizer áseri mol. Bul rette Memleket basshysy «Elimiz úshin halyq birligin saqtaý óte mańyzdy», dep atap ótip, qajetti alǵysharttar men naqty máselelerge toqtaldy.
Basqosýda onomastıka, tarıh, rýhanııat, qazaq tili, eldik qaǵıdattary, ulttyq biregeılikti nyǵaıtý máseleleri de sóz boldy.
«Men ekonomıkany damytý úshin «Kreatıvti ındýstrııanyń» mán-mańyzy zor ekenin únemi aıtyp júrmin. Bul memlekettik tildiń bolashaǵy úshin de óte mańyzdy. Qazaq tilin damytamyz desek, qazirgi zamanǵy ádis-tásilderdi barynsha tıimdi paıdalanǵan durys. Tek aqparattyq tehnologııanyń paıdaly jaǵyn alyp, zııandy jaǵynan saq bolǵan jón. Ashyǵyn aıtsaq, ınternetti talǵamsyz paıdalaný bala tárbıesine teris yqpal etip jatyr. Bul – ókinishke qaraı, aqıqat. Balalar túgil, ata-analar da áleýmettik jelidegi maǵynasyz kontentke tym áýes. Biz, eń aldymen, jastardy kitap oqýǵa baýlýymyz kerek. Sonda jappaı kitap oqıtyn ultqa aınalamyz», degen Prezıdent elimizde kitap oqýdyń kenjelep qalǵanyn, keıingi jyldary jaǵdaıdy túzeý úshin áreket jasalyp jatqanyn aıtty.
Memleket basshysynyń nazarynan qaýipti kesel – lýdomanııa, ıaǵnı qumarpazdyq ta shet qalmady. Elimizde 400 myńǵa jýyq azamat – býkmekerlik keńseler men kazınolardyń turaqty klıenti. Bul – tutas bir qalanyń halyq sanyna para-par kórsetkish. Prezıdent aıtqandaı, shyn máninde, lýdomanııa – beıbit kúnde eldiń shyrqyn buzyp otyrǵan qater. Sonyń kesirinen talaı shańyraq shaıqaldy. Talaı azamat zań buzyp, qylmysqa uryndy. Qumar oıyn úshin qaryzǵa batyp, ózine qol jumsaǵan jandar týraly habarlar, ókinishke qaraı, kún saıyn tarap jatady. Bul dert jas urpaqqa óte úlken zııan keltiredi. Onlaın oıyndar balalardyń kúndelikti ermegine aınalyp barady. Sonymen qatar Quryltaı otyrysynda teris dinı aǵymdardyń zardaby jaıynda da jan-jaqty aıtyldy.
Dástúrli túrde ótetin Quryltaıda aıqyndalǵan baǵyttar elimizdiń barlyq salasy úshin mańyzdy. Osy oraıda oblys ákimdiginiń jastar saıasaty basqarmasy el Prezıdenti júktegen mindetterge basa mán berip, olardy oryndaýǵa qatysty jumystardy júıeli júrgize beredi.
Jomart ZULPYHAR,
Jambyl oblysy ákimdiginiń basqarma basshysy
