Sýretti túsirgen – Aqádil Rysmahan
«Taza aýla. Taza ólke. Taza el!» uranymen ótip jatqan ekologııalyq aksııaǵa óńir basshysy Erbol Qarashókeev bastap, ózge de atqaminer azamattar qatysty. Bul kúni kóne shahardaǵy jańa shaǵyn aýdan sanalatyn «Uly dalanyń» aýmaǵyna 125 túp qaraaǵash, 100 túp emen, 170 túp terek pen 101 túp shyrsha kósheti egildi.
Jalpy alǵanda óńir boıynsha «Taza Qazaqstan» aksııasyna 27 myńnan asa oblys turǵyny úles qosyp jatyr. Qalalar men aýyldardy abattandyrýǵa atsalysyp jatqandardyń ishinde túrli kásiporyn men áleýmettik mekemelerdiń 5 222 qyzmetkeri bar ekenin aıta ketken jón. Is-shara bastalǵaly beri óńirde 60 tarıhı-mádenı eskertkishtiń mańaıy qoqystan tazartylyp, 143 saıabaq, 1 400-ge jeteǵabyl aýla, 8 300 sharshy metr sý júıeleri tazalandy.
Jergilikti atqarýshy bılik keltirgen derekke júginsek, óńir boıynsha abattandyrý, kógaldandyrý jáne sanıtarlyq tazalaý jumystaryna qazynadan 9,4 mlrd teńge qarjy qarastyrylǵan. Qazirgi kezge deıin 57 100 kóshet egilgen eken. 809,4 myń shaqyrym aryq-atyz tazalanǵan. Bul jumystar aldaǵy ýaqytta da sátimen jalǵasady.
«Prezıdent tapsyrmasy aıasynda qala ınfraqurylymyn jaqsartý úshin keshendi jumystar júrgizilip jatyr. Memleket basshysy qalalardy laıyqty jáne tartymdy etip ustaýdyń mańyzy zor ekenin atap ótken edi. Osy oraıda óńir halqy jumylǵan judyryqtaı birigip, ekologııalyq aksııaǵa belsendilikpen qatysyp jatqanyn aıta ketken jón», deıdi óńir basshysy E.Qarashókeev.
Resmı derekke sensek, qazirgi kezde Taraz qalasyndaǵy aǵashtardy túgendeý jumystary júrgizilip jatyr. Osy jumystar aıaqtalǵannan keıin qala boıynsha utymdy sýarý júıesin qalyptastyrý maqsatynda arnaıy dendrokarta jasalmaq.
Taraz
