- 3–5 mamyr aralyǵynda Tájikstannyń bas shahary Dýshanbede dzıýdodan Grand Slam týrnıriniń jalaýy jelbireıdi. Olımpııa oıyndaryna qatysý úshin reıtıngtik upaılar beriletin básekede Qazaqstannyń týy astynda Maǵjan Shamshadın, Nurqanat Serikbaev (60 kg), Elaman Sultanbaı, Almas Ǵalymov (66 kg), Dastan Shaıahmetov, Darhan Qoıbaǵar (73 kg), Abylaıhan Jubanazar (81 kg), Aıan Baıǵazy, Dıdar Hamza (90 kg), Islam Bozbaev, Nurlyhan Sharhan (100 kg), Elaman Erǵalıev jáne Erasyl Qajybaev (+100 kg) syndy sańlaqtar óner kórsetedi.
- Fýtboldan Qazaqstan Premer-lıgasynyń altynshy týr oıyndary aıaqtaldy. Bul matchtarda mynadaı esepter tirkeldi: «Turan» – «Astana» – 0:2, «Atyraý» – «Qyzyljar» – 2:0, «Tobyl» – «Jeńis» – 1:1, «Qaısar» – «Qaırat» – 1:0, «Elimaı» – «Ordabasy» – 1:1, «Jetisý» – «Ordabasy» – 2:1.
- Stend atýdan Edýard Eshenko Parıj Olımpıadasynyń joldamasyna ıelik etti. Ol «skıt» baǵdarlamasy boıynsha irikteýden ótip, fınalǵa joldama aldy. Nátıjesinde, úshinshi oryndy enshilep, ǵalamdyq dodaǵa qatysatyn sportshylardyń tizimine qosyldy. Bul – mergenderdiń ekinshi joldamasy. Buǵan deıin «trap» jattyǵýy boıynsha Marııa Dmıtrıenkonyń baǵy janǵan edi.
- Jeńil atletıkadan Shanhaıda ótken «Gaýhar lıgasy» týrnırinde Deızı Djepkemeı sátsiz óner kórsetti. Qazaqstannyń namysyn qorǵaıtyn kenııalyq legıoner 3 000 metrge júgirýde máre syzyǵyn jetinshi bolyp qıyp ótti. Onyń kórsetkishi – 9:25.10. Bul jarystyń bas júldesin Kenııanyń jelaıaǵy Beatrıs Chepkoech (9:07.36) oljalady. Ýgandalyq Perýt Chemýtaı (9:15.46) kúmis alsa, germanııalyq Geza-Felısıtas Kraýze (9:16.24) qolaǵa qol sozdy.
- Anglııanyń Haıton qalasynda ótken jarysta orta salmaqta judyryqtasyp júrgen tanymal kásipqoı boksshy Tursynbaı Qulahmet (7-1, 5 KO) polshalyq Robert Talarekpen (28-25-3, 19 KO) kúsh synasty. Bul jekpe-jek tórtinshi raýndta jerlesimizdiń aıqyn jeńisimen aıaqtaldy.
- Qytaıda týyp-ósken qazaq faıteri Maqsat Qaısar (9-3) UFC-degi tórtinshi kezdesýin ótkizdi. AQSh-tyń Las-Vegas qalasynda uıymdastyrylǵan jarysta qandasymyz 35 jastaǵy Meksıkanyń marqasqasy Gabrıel Benıtesten (23-11) basym tústi.
- Dzıýdodan elimizdiń jastar quramasy kezekti oqý-jattyǵý jıynyn Túrkistan oblysyndaǵy «Alma taý» bazasynda ótkizip jatyr. Jerlesterimizden bólek bul jerde О́zbekstan men Túrikmenstannyń da balýandary jattyǵyp júr.
- Fýtboldan Qazaqstannyń Lıga kýboginiń jerebesi tartyldy. Júlde qory 1 mln dollardy quraıtyn dúbirli dop dodasynyń toptyq týrnırinde myna komandalar ózara sheberlik baıqasady: A tobynda – «Qaırat», «Qyzyljar», «Aqjaıyq», «Taraz»; B tobynda – «Tobyl», «Aqtóbe», «Qaısar», «Jeńis»; S tobynda – «Ordabasy», «Atyraý», «Turan», «Elimaı»; D tobynda – «Astana», «Shahter», «Jetisý», «Kaspıı». Bul jarys 25 mamyrda bastalyp, 24 qarashada márege jetedi.
- Birinshi orta salmaqta judyryqtasyp júrgen 33 jastaǵy qazaqtyń kásipqoı boksshysy Batyr Júkembaev 22 mamyrda AQSh-tyń Plant-Sıtı qalasynda ýkraınalyq Ivan Redkachpen kúsh synasady. 33 jastaǵy Jambyl boks mektebiniń túlegi osy kúnge deıin 21 ret rıngke kóterilip, sol básekelerdiń bireýinde ǵana utyldy. Batyr 14 qarsylasyn nokaýtqa jiberdi. 38 jastaǵy Ýkraına boksshysy 31 kezdesýdiń 24-in óz paıdasyna sheshti. Redkach 19 básekeni merziminen buryn aıaqtady.
