Naýryz aıynda ondaǵy jurttan beınebaıan jetken. Qyzylsaıada ósken Aleksandr Bokk, Polına Bokk, Pavel Gertelder otbasymen aq dastarqan basyna jınalypty. Qaıdan tapqanyn kim bilsin, sary qymyz sapyrýly. Dastarqannyń ústinde narttaı qyzyl baýyrsaq. Sálden soń Pavel astaýǵa salynǵan et ákeldi. Týyrylyp túsken qazy, qyrtysy qalyń tutas jambas, uzyn omyrtqa, jal men jaıa. Sodan soń sóz sóılegen. О́zderi atajurt sanaıtyn qalyń eldi jyl basymen quttyqtady. Kúni keshe kir jýyp, kindik kesken topyraǵyna, artynda qalǵan eline bereke, baqyt tilegen. Tebirenip turdy, tolǵana aıtty. Sóziniń sońynda Germanııada qustyń sútinen basqanyń bári bar ekenin, sharshysyna tolyp tursa da, qııandaǵy Qyzylsaıanyń qotanyndaǵy tasqudyqtyń tastaı sýyn saǵynatynyn jetkizgen. Dál sol sátte aq sary óńi alaýlap, kirpigine tasqudyqtyń móldir sýyndaı qos tamshynyń ilinip qalǵanyn kórdik.
Tasqudyǵyn biz de kórgenbiz. Qyryq kún shildede sýy sarqylmaıtyn, etek-jeńi keń pishilgen Qyzylsaıa aýlynyń jany turmaq, malyn da meltektetip shólin qandyratyn qudyq. Tabıǵı tastarmen shegendelgen, joǵary jaǵy jýan aǵashtarmen kóterilgen kóne qudyqtyń sýyn eshbir zerthana tekserip kórmegen. Áıtse de, nesheme jyldan beri shólirkegen jannyń shólin qandyryp kele jatyr. Úrip iship, shaıqap tógip otyrǵan Germanııadaǵy nemis aǵaıyn osy qudyqtyń sýyn ańsaıdy.
Byltyr bir qaýym jurt, áldeneshe otbasy birlese saparlap, ystyq uıalaryna kelip ketken. Týǵan jerdiń topyraǵyna tabandary tıisimen mundaǵy jurttyń qyzyǵyna qaıyrly bolsyn, qaıǵysyna qaıyryn bersin dep kóńil bildirgen. Burynǵynyń jolymen bata jasapty. Aýyldaǵy molda atany aldyryp, quran baǵyshtatypty. Oblys ortalyǵyndaǵy meshittiń ashanasynda ózderi jaqsylyǵyn kóp kórgen, quddy et jaqyn týystaryndaı bolyp ketken jerlesteriniń arýaǵyna baǵyshtap as beripti.
– Jaman aýrýdan jasqanyp, birer jyl el betin kóre almaı kettik, – depti Aleksandr Bokk, – qaıǵylaryńyzǵa ortaqpyz. Bir úıdiń balasyndaı bolyp ósip edik. Qııan shette júrsek te, sizderdi oılap júremiz. Jalǵyz Qyzylsaıanyń ǵana emes, tutas Qazaqstannyń jetistigin, jaqsylyǵyn estisek, tóbemiz kókke bir eli jetpeı qalady.
Dám qaıtaryp turǵan soń, Aleksandrdy qaýmalaǵan mundaǵy jurt údere kóshken eldiń amandyq-saýlyǵyn suraǵan.
– Sen musylman emessiń ǵoı, – dep qaljyńdapty qurdasy Dýman, – meshitke nege kiresiń?
– Nıetimiz taza, – degen Aleksandr Bokk, – keshe monshaǵa tústik, ǵusyl dáret aldyq, tánimiz tazardy. Al janymyz ejelden taza ǵoı.
Qalaı tamasha aıtqan. Qara sózdiń qaımaǵyn qalqıtyn bizdiń sheshender dál osylaı aıta alar ma edi?
Kókshetaý qalasy
