– Bıyl aýdanda úı kezeginde turǵan azamattardy jáne «Qaladan – aýylǵa» baǵdarlamasyna nıet bildirgen otbasylardy turǵyn úımen qamtamasyz etý maqsatynda aýdanymyzda 115 baspana salynyp jatyr. Iаǵnı aýdandaǵy 27 eldi mekende jańa baspana salynady, – deıdi Qaztalov aýdanynyń ákimi Aslanbek Sarqulov.
Jergilikti baspanaǵa muqtaj turǵyndardy jáne elge kelgen jas mamandardy turǵyn úımen qamtamasyz etý úshin byltyr bıýdjet qarjysyna 22 turǵyn úı satyp alynǵan eken. Sonyń tórteýi jańadan salynǵan. Sonymen qatar jyl basynda aýdan ortalyǵyna kelgen 6 dáriger de jańa turǵyn úımen qamtamasyz etilgen. Ákimniń aıtýynsha, qazirgi tańda aýdan boıynsha 511 azamat úı kezeginde tur.
Aýdanda jańa úı salý jobasyna atsalysýǵa jeke tulǵalar, kásipkerler, sharýa qojalyq jetekshileri nıet bildirip otyr. Qazirdiń ózinde Qaztalov aýylynda Rýslan Rahmetov qos páterli turǵyn úı qurylysyn bastap ketken.
«О́ńirde oblys ákimi Narıman Tóreǵalıulynyń bastamasymen «Qaladan – aýylǵa» atty joba júzege asyp jatyr. Osy joba aıasynda aýdanymyzdyń 8 eldi mekenine 16 otbasyn kóshirip ákelý josparlandy. Jańa jyldyń basynda Oral qalasynan Sısenovter otbasyn kóshirip ákeldik. Olar Bolashaq aýyldyq okrýginiń Jańatań eldi mekenine ornalasty, baspanamen, turaqty jumyspen qamtyldy», deıdi aýdan basshysy.
Jańa turǵyn úılerdiń qurylysy – qazir aýdanda erekshe nazarda turǵan másele. Okrýg ákimderi men bólim basshylary joba aıasynda salynatyn baspanalardyń merdigerin naqtylap, qurylys qarqynyn qadaǵalap otyr. Sonymen qatar turǵyn úılerdiń bekitilgen talapqa saı bolýy, sapasy da – árdaıym nazarda.
Batys Qazaqstan oblysy
