Foto: rr-europe.woah.org
Ǵylymı jobanyń jetekshisi, veterınarııa ǵylymdarynyń doktory, QazATZÝ Mıkrobıologııa jáne bıotehnologııa kafedrasynyń professory Aıtbaı Býlashevtyń aıtýynsha, brýsellezdi dıagnostıkalaýdyń jańasha ádisinde artyqshylyqtar bar.
– Otandyq quramdas bólikterden jasalǵan janama gemagglıýtınasııa reaksııasy-jınaǵyn dıagnostıkalyq tájirıbege engizý dıagnostıkýmnyń qarapaıymdyǵy men qunynyń tómen bolýy esebinen veterınarııalyq is-sharalardyń tıimdiligin edáýir arttyrady. Al álemdik veterınarııalyq tájirıbede alǵash ret erıtrosıttik antıgen retinde paıdalanatyn rekombınantty aqýyzdar serologııalyq zertteýlerdiń ereksheligin arttyrýǵa múmkindik beredi. Bul ádis-tásildiń kómegimen adamǵa juqqan brýsellezdi dıagnostıkalaýǵa da qoldanýǵa bolady, – deıdi A.Býlashev.
Brýsellezdiń dıagnostıkasy janýarlardyń basqa da asa qaýipti aýrýlarynyń dıagnostıkasy sekildi memlekettik monopolııaǵa kiredi. Sondyqtan janama gemagglıýtınasııa reaksııasy-jınaǵynyń negizgi tutynýshylary – respýblıkalyq veterınarııalyq zerthana, onyń oblystyq jáne aýdandyq bólimsheleri, sondaı-aq Aýyl sharýashylyǵy mınıstrligi veterınarııalyq baqylaý jáne qadaǵalaý komıtetiniń veterınarııa jónindegi ulttyq referenttik ortalyǵy.
Joba nátıjesinde erıtrosıtterdiń (qatty fazanyń) syrtqy membrananyń jalǵyz rekombınantty aqýyzdarmen (Omp19, Omp25, Omp31), Brucella tektes bakterııalardyń perıplazmalyq keńistigimen sondaı-aq hımerıkalyq aqýyzdarmen sensıbılızasııasy úshin ońtaıly jaǵdaı jasalǵan. Jeke aqýyzdardan erıtrosıttik antıgen daıyndalyp, olardyń janama gemagglıýtınasııa reaksııasy-jınaǵyndaǵy gomologııalyq jáne geterologııalyq sarysýlardaǵy antıgenderi zerttelgen. Atalǵan rekombınantty brýsella aqýyzdarynyń E. coli-prodýsentteri shtammdarynyń bakterııalyq massasy ázirlengen.
