Foto: gov.kz
Turmysta oryn alatyn asa aýyr qylmystarǵa jaýapkershilik kúsheıtildi. «Úı tırandaryn» shańyraǵynan 30 kúnge oqshaýlaý, jábirlenýshimen baılanysqa tyıym salý múmkindigi engizildi.
Zańnamalyq jańalyqtardyń bir bóligi kámeletke tolmaǵandarǵa qarsy qylmystar úshin jazany qatańdatýdy qamtıdy. Qazaqstan qoǵamy kútken mańyzdy norma Qylmystyq kodekste kózdelgen eń aýyr jaza – pedofılder men balalardy óltirgen qylmyskerlerdi ómir boıy bas bostandyǵynan aıyrýdy engizý.
Zańda kámeletke tolmaǵandarǵa qarsy densaýlyqqa zııan keltirýden bastap, urlaý men óltirýge deıingi qylmystardyń barlyq túri aıqyndaldy jáne saralandy. Mundaı qylmystar úshin tatýlasýǵa baılanysty qylmystyq jaýaptylyqtan bosatý múmkindigi alynyp tastaldy. Kámeletke tolmaǵandarǵa qatysty jynystyq zorlyq-zombylyq pen sýısıdke kómektesý faktisi boıynsha qylmystyq jaýapkershilik engizildi. Kámeletke tolmaǵandardy qorlaý jáne kıberbýllıng jasaǵany úshin ákimshilik jaýapkershilik te qarastyryldy. Oǵan synyptastaryn qorlaǵan jasóspirimderdiń ata-analary men qamqorshylary da tartylady.
Ishki ister mınıstrliginde otbasyndaǵy zorlyq-zombylyqqa qarsy kúres jónindegi mamandandyrylǵan bólimshe qurylady. Mádenıet jáne aqparat mınıstrliginiń Jastar jáne otbasy isteri komıteti osy baǵyttaǵy memlekettik otbasylyq saıasatqa jaýapty bolady. Qazirgi otbasyn qoldaý ortalyqtary qaıta qurylady.
Bul is-sharalardyń barlyǵy turmystyq zorlyq-zombylyq qurbandaryn qorǵap, qoldaýǵa jáne jalpy zorlyq-zombylyqqa tózimdiliktiń nóldik deńgeıine jetýge baǵyttalǵan.
Birikken Ulttar Uıymy atalǵan zańdy qabyldaǵany úshin Qazaqstanǵa rızashylyǵyn bildirdi. Bul genderlik zorlyq-zombylyqtyń barlyq nysanyn joıý jolyndaǵy mańyzdy qadam bolǵanyn atap ótip, atalǵan zańdy tıimdi engizý jáne qoldaný jónindegi kúsh-jigerdi jalǵastyrýǵa shaqyrdy.
Igor TARASENKO,
Adam quqyqtary jóninde ýákildiń Pavlodar oblysy boıynsha ókili
