Tabıǵatty aıalaýdy dáriptegen aksııaǵa Ekologııa jáne tabıǵı resýrstar mınıstri Erlan Nysanbaev, Astana qalasy ákiminiń orynbasary Ersin О́tebaev, sondaı-aq AО́SShK-ge múshe memleketterdiń elshileri men dıplomatııalyq korpýstyń ózge de ókilderi qatysty.
Alleıa 2021 jyldyń 1 maýsymynda AО́SShK-niń 30 jyldyǵy qarsańynda ashylǵan. Mundaı bastama uıymnyń qorshaǵan ortany qorǵaý jónindegi zertteýlerine negizdelgen basty baǵyttaryn iske asyryp, Turaqty damý maqsattaryna qol jetkizý jolyndaǵy jumystaryna ujym bolyp atsalysýdy kózdep otyr.
Bıyl aksııa qatysýshylary 100 túp sakýra aǵashy, Sıvers almasy men qyzyl sheten aǵashtarynan bólek 35 túp maıda japyraqty qaraǵash kóshetterin otyrǵyzdy.
– Qolǵa alynyp jatqan bul bastamalar elimizdiń tabıǵı resýrstaryn saqtaýǵa ǵana emes, sonymen qatar jergilikti halyqtyń ómir súrý sapasyn jaqsartýǵa jáne bolashaq urpaq úshin qolaıly jaǵdaı jasaýǵa septigin tıgizedi, – deıdi mınıstr E.Nysanbaev.
Astana qalasy ákiminiń orynbasary E.О́tebaev, óz sózinde qala ómirinde ekologııalyq turaqtylyqqa degen talpynystyń baryn atap ótti. Ol sondaı-aq AО́SShK alleıasyn jańa kóshettermen tolyqtyryp, jetildirý sekildi ıgi bastamalar arqyly memleketter arasynda qorshaǵan ortany qorǵaý salasyndaǵy yntymaqtastyqty damytýdyń mańyzy zor ekenin atap ótti.
Al Azııadaǵy ózara is-qımyl jáne senim sharalary keńesiniń bas hatshysy Qaırat Sarybaı qorshaǵan ortany qorǵaý jolyndaǵy aksııaǵa atsalysyp, ıgi bastamaǵa úles qosqan azamattarǵa alǵysyn jaýdyryp, olardyń osyndaı is-sharalar arqyly uıymǵa qoldaý bildirgen yqylastaryna rızashylyǵyn bildirdi.
Ol sondaı-aq AО́SShK-niń ekologııalyq zertteýler aıasyndaǵy yntymaqtastyǵynyń artyp kele jatqanyna toqtalyp, onyń jarqyn mysaly retinde Prezıdent Qasym-Jomart Toqaevtyń qorshaǵan ortany qorǵaý máseleleri boıynsha AО́SShK-niń Mınıstrlik konferensııasyn shaqyrý jónindegi bastamasyn atap ótti.
Sondaı-aq Qaırat Sarybaı Ázerbaıjannyń tóraǵalyǵymen ótetin AО́SShK Mınıstrler keńesiniń otyrysy bıyl qarasha aıynda Bakýde BUU-nyń Klımattyń ózgerýi jónindegi konferensııasynyń (COP-29) bastalýymen tuspa-tus keletinin, bul ekologııalyq problemalardy sheshý jolyndaǵy birlesken jumystyń ózektiligi men der kezinde kóterilgen másele ekenin kezekti márte kórsetip otyrǵanyn atap ótti.
