Jergilikti jurtpen tonnyń ishki baýyndaı aralasyp ketken dúngen jurty qazaqy dástúrdi berik ustanady. Ulystyń uly kúni Naýryz merekesin qazaq halqymen birge toılatyp jatatyndary da bar. Eń bastysy, olardyń basym kópshiligi memlekettik tildi meńgerýge talpynyp, talaptanyp júr. Tipti qazaq tilin bizden bir mysqal kem bilmeıtinderi de bar.
Ásirese Masanshy aýylyn mekendegen dúngen ókilderiniń basym kópshiligi memlekettik tildi bir kisideı meńgergen. Olar jergilikti ult ókilderimen qazaq tilinde erkin tildesedi. Solardyń biri – memlekettik tildi jergilikti mektep oqýshylaryna da úıretip, oqytyp júrgen dúngen qyzy Shehýar Mýsarova.
Shehýardyń aıtýynsha, memlekettik tilge degen qurmet onyń qazaq tili men ádebıeti pániniń muǵalimi bolýyna yqpal etken. Sodan da bolsa kerek, Masanshy aýylyndaǵy mektepte 12 jyl boıy qazaq tili men ádebıeti pániniń muǵalimi bolyp qyzmet atqaryp júr.
«Áýeli Qordaıdaǵy «Bereke» kolledjinde arnaýly orta bilim aldym. Keıinnen Taraz qalasyndaǵy burynǵy Jambyl gýmanıtarlyq ýnıversıtetinde oqýymdy jalǵastyryp, qazaq tili men ádebıeti pániniń muǵalimi mamany atandym. Men úshin oqýshylarmen jumys istegen óte qyzyq. Ár balanyń boıynda memlekettik tildi meńgerýge degen qulshynys joǵary. Munyń ózi etnos ókilderiniń jergilikti halyqqa degen qurmetin aıqyndap tursa kerek. Qazirgi kezde Ál-Farabı atyndaǵy №50 mektepte 5, 10-synyp oqýshylaryna, bastaýysh synyp bilim alýshylaryna sabaq beremin. Bolashaq urpaqtyń sanasyna bilim nárin seýip júrgenimdi maqtan tutamyn. Oqýshylarymnyń qazaq tilin úırenýge degen qulshynysy meni kádimgideı qanattandyrady. Sondyqtan da bar bilgenimdi úıretýge kúsh salamyn», deıdi Sh.Mýsarova.
Dúngen etnosy kóp shoǵyrlanǵan aýylda eńbek etip júrgen ol bastapqyda tálimger retinde jumys istepti. Keıinnen jergilikti balalardy qazaq tiline baýlý maqsatynda qazaq tili men ádebıeti pániniń muǵalimi retinde iske kirisken.
Qazaqstan men Qyrǵyz Respýblıkasynyń shekarasynda turǵan Qordaı aýdanynda qazaq halqynan keıin dúngen ultynyń ókilderi tyǵyz shoǵyrlanǵan. Olar qazirgi kezde jergilikti ultpen bite qaınasyp, tatý-tátti ǵumyr keship jatyr. Birlik pen dostyqty, tatýlyqty bárinen bıik qoıǵan dúngenderdiń qazaqtarǵa degen qurmeti bólek.
«Memleket basshysy qazaq tili bolashaqta etnosaralyq qatynas tiline aınalatynyn aıtty. Shyny kerek, qazaq dalasynda dúnıege kelip, kıeli topyraǵynda ósip-óngennen keıin memlekettik tildi bilý paryzym dep esepteımin. О́ıtkeni qaı qalaǵa barsaq ta, qandaı qyzmetke táýeldi bolsaq ta, qazaq tilin bilýge tıispiz. Memlekettik tilde erkin sóılep, óz oıymyzdy aıqyn bildirýimiz kerek. Birlik bar jerde berekeniń artatyny anyq. Bul – dáleldeýdi qajet etpeıtin aksıoma. Tatýlyq pen dostyq qaı kezde de bárinen bıik turady. Jany jaısań azamattar qonystanǵan Jambyl oblysynda birlik pen berekeli tirliktiń arqasynda janǵa jaıly ǵumyr keship jatyrmyz. Dostyqtan asqan qundylyq joq. Kez kelgen azamat osyny esinen shyǵarmasa eken degen tilegim bar. Judyryqtaı jumylǵan eldiń baǵyndyrmaıtyn belesi, almaıtyn asýy bolmaıdy», deıdi Sh.Gýsarova aǵynan jarylyp.
Masanshy aýylyndaǵy mektepte eńbek etetin ózge ult ókilderiniń qazaq tiline degen qurmeti bólek. Olardyń biri jergilikti bilim ordasynda sabaq berip júrse, endi biri balabaqshadaǵy dúngen balalaryna memlekettik tildi úıretýden jalyqqan emes.
Jambyl oblysy,
Qordaı aýdany
