Ardaq – Arkadıı

– Qazaq tiline qyzyǵýshy­ly­ǵym­dy qazaq tili páninen sabaq ber­gen Gúlmıra Ábildaqyzy oıatty. Aýlada qazaq balalarmen bir­ge oınap óskendikten, tildi onsyz da biletinmin. Biraq durystap den qoıǵanym muǵalimimniń ar­qasy. Ol kisi meni aýdandyq, ob­lystyq, respýblıkalyq til baı­qaýlaryna qatystyratyn. Sóıtip, qazaqshany qazaqtan kem bilmeıtin dárejege jettim, – degen Arkadıı Pobedınskııdiń áńgimesin tyńdaýdyń ózi janyńdy jadyratady.

Otan aldyndaǵy áskerı boryshyn ótep kelgen ol 2022 jyldan beri S.Qojamqulov atyndaǵy Jezqazǵan mýzykalyq-drama teat­rynyń qýyrshaq trýppasynda akkomponıator qyzmetinde. Alaıda Arkadııdiń áke-sheshesi qoıǵan nyspysy qazir umytyla bastaǵan. О́ıtkeni...

Qazaqstannyń eńbek sińirgen ártisi, ánshi Ǵalym Muhamedın birde teatrǵa kelgende qazaqshany sýdaı sapyryp otyrǵan sary­do­malaqty kórip, áýelide «orys­pyn» degenine nanbapty. Keıin­nen onyń qazaqshasyna súısingeni sonshalyq, «Sen budan bylaı men úshin Arkadıı emes, Ardaqsyń», depti. Ǵalym aǵanyń qoıǵan esimi áriptesterine de unap, qazir ony barsha jurt «Ardaq» deıtin kórinedi.

Ol álem ertegilerin qýyr­shaq tilimen qazaqsha sóıletedi. Júrgen ortasyna syıly, kórer­me­ni – balalarǵa súıkimdi. Jaqyn biletinder Arkadııdiń izdenim­paz­dyǵyna tánti. Ol Jezqazǵan mýzykalyq kolledjine oqýǵa túsýge kelgende bar bolǵany kórkemsóz oqıtyn. Mýzykalyq aspaptarda oınaı almaıtyn. Qazir dombyranyń qulaǵynda oınaıdy. Qazaqtyń basqa da birqatar ulttyq aspabyn da meń­gerip alǵan. Munyń bári – izdenis­tiń jemisi.

Arkadıı osy jyldy eń be­rekeli jylǵa balaıdy. О́ıt­keni jýyrda ǵana «Shapaǵat» medalimen marapattaldy.

– Medaldi Aqordanyń tórin­de Prezıdent Qasym-Jomart Toqaevtyń qolynan alǵanymdy erekshe maqtanyshpen aıta alamyn. Men marapat alǵan osy sátti ǵumyr boıy asa zor maqtanyshpen aıtamyn, – deıdi Arkadıı. Biz keıipkerimizdi qujaty boıynsha jazyp otyrmyz. Áıtpese, bul azamatqa «Ardaq» degen esim ábden jarasymdy sekildi.

Jezqazǵan qalasy