Tasqynnan keıin qurylys artady

Oblystyq qurylys basqarmasynyń basshysy Álibek Antazıevtiń aıtýynsha, tabıǵat apaty kezinde Qaratóbe aýdanynda – 116, Syrym aýdanynda – 243, Bórlide – 218, Terekti aýdanynda – 649, Báıterekte – 62, Tasqalada – 6, Oral qalasynda 17 úıge sý kirgen eken. Osynyń ishinde 1 150 úıge arnaıy komıssııa baryp, tehnıkalyq tekseris júrgizilgen. Tekseris nátıjesinde 413 úı odan ári turýǵa jaramsyz dep tanylǵan. Iаǵnı Qaratóbe aýdanynda – 90, Syrymda – 114, Terektide – 81, Báıterekte – 7, Bórli aýdanynda 121 úı jańadan salynatyn boldy. Aıta keteıik, baspanasy tasqynnan zardap shekken turǵyndardyń ótinishi áli de túsip jatyr. Sondyqtan qurylys aýqymy budan kóbirek bolýy múmkin.

– Jańadan salynatyn turǵyn úıler ortalyq mem­lekettik organ bekitken úlgi joba boıynsha salynady. Qa­zir bizdiń qolymyzda eki eskız­dik joba bar. Iаǵnı jańa úıler 3 bólmeli, jalpy aýmaǵy 80 sharshy metr bolmaq. Bir páterli jeke turǵyn úı jáne eki páterli 160 metrlik turǵyn úı salynady. Bul úılerdiń bar­lyq ınjenerlik jelisi qo­sylǵan, birden kirip, tura berý­ge daıyn bolady. Biz qazir úıi sýǵa ketip, dalada qalǵan jer­les­terimizdi barynsha qys­qa ýaqytta baspanamen qamta­masyz etý úshin bar kúshti salamyz, – dedi Álibek Saıynuly.

Qazir joǵaryda atalǵan alty aýdanda da jaramsyz dep tanylǵan turǵyn úılerdi qalpyna keltirý boıynsha qyzý jumys bastaldy. Eń bastysy, jańa qurylys sý baspaıtyn, qaýipsiz jerge salynady. Bul úshin arnaıy geologııa jáne topo-túsirilim jumystary júrgizilip, jer ýchaskeleri anyqtalyp jatyr. Á.Antazıevtiń aıtýynsha, Qaratóbe aýdanynda – «StroıKonsaltıng» JShS, Syrym aýdanynda –«Shine Project» JShS, Terekti aýdanynda – «Smartech» JShS, Bórli aýdanynda «EvroPlıýs» sekildi fırmalar úlgi joba negizinde baılam jasaýǵa kirisip te ketken. Sonymen qatar úı qurylysymen aınalysatyn jergilikti merdiger uıymdardyń tizbesi de ázir kórinedi. Terekti aýdanynyń Podstepnoe kentinde qıraǵan úılerdiń orny tazartylyp, irgetas quıyla bastaǵan.

Buǵan qosa jaqynda «Qazaq­­stan halqyna» qoǵam­dyq qory men Batys Qazaq­stan oblysynyń ákimdigi memo­randýmǵa qol qoıyp, Syrym aýdanynda sý tasqynynan zardap shekken otbasylar úshin turǵyn úı salý týraly kelisken edi. Bul memorandým aıasynda qor qarajaty esebi­nen Jympıty aýlynda – 49 úı, Buldyrty aýlynda – 25 úı, О́leńti aýlynda – 38 úı, Jetikól aýlynda – 1 úı, Jańaqonys aýlynda 1 úı salynatyn boldy.

Al ózge aýdandardaǵy jaramsyz úılerdi Qarashyǵanaq Petroleým Opereıtıng b.v. kompanııasy, jergilikti bıznes ókilderi jınaǵan jáne qaıyrymdylyq qorlarynan túsken qarajat esebinen salý josparlanǵan.

Memleket basshysy jańa turǵyn úılerdiń qury­ly­sy jylytý maýsymyna deıin aıaqtalýyn qatań tapsyr­dy. Qazir bul másele – ob­lys ákim­diginiń jeke baqylaýynda.

Batys Qazaqstan oblysy