Birinshi mamyrda tabıǵat taǵy bir tosyn álek jasap, túski saǵat 14.00-den keshki 20.00-ge deıin úzilissiz jaýyn jaýdy. Qalanyń ishinde saı-salany alyp ketken sý Esildiń sýyn da birshama bıiktetti. Sınoptıkter 1 mamyrdan bastap sý turaqty túrde tartylady degen edi, endi aspannan berip, ózen sýyn eselep ketti.
Petropavldyń sý basqan shaǵyn aýdandarynyń turǵyndary aıǵa jýyq óz úıin kórgen joq. Dúnıe-múlki de sý basqan úılerinde tur. Soǵan alańdaǵan keıbir turǵyndar sý turǵan úılerine barǵysy kelip júr. «Sýda turǵan úılerge áli barýǵa bolmaıdy. Ondaılardyń tóbesi túsip nemese qabyrǵasy aıyrylyp ketip, adamdar japa shegýi múmkin. Biraq soǵan qaramaı, úıine umtylýshylar kóp. Ondaıdyń keıbirin biz rezeńke qaıyqpen qýyp júrip ustadyq», deıdi TJD baspasóz hatshysy Evgenıı Jýravlev.
Sý basqan aýdandarda áli de 3 myńdaı úı sýda tur. Olardyń turǵyndarynyń arasynan 906 adam evakýasııalyq beketterde, jataqhanalarda, keıbiri týystarynyń úıinde nemese jaldamaly páterde turyp jatyr.
Degenmen sý kóp baspaǵan Oıqalanyń dóńindegi keıbir úılerdiń mańy qurǵap, ishi de kepkeni kórinip tur. Osyndaı úılerdiń turǵyndaryn ákimdiktiń kelisimimen PD men TJD qyzmetkerleri ózderimen birge aparyp júr. Saqtyq úshin sýda turǵan basqa úılerge olardy jibermeý qarastyrylyp jatyr. «Polısııa qyzmetkerleri mundaı jerlerde eki aýysymmen patrýldik atqarady. Sýy tartylyp, mańaıy kebe bastaǵan úılerdi patrýldik aımaqqa qosyp otyramyz. Qazir úıine kelgen turǵyndar úı múlikterin jaıyp, keptirip jatyr. Jalpy, jaǵdaı tynysh», deıdi Petropavl qalasy PB bastyǵynyń orynbasary Álibek Ǵabdýlın.
Qyzyljar aýdanynyń aralda qalǵan Prıbrejnyı aýly týraly buryn jazǵanbyz. Bul aýyldyń ózi dóńde ornalasqandyqtan, sý tek shetki úılerin basqan. Aýyldyń ózi qazirgi kózqaraspen qaraǵanda, úlken 600-ge jýyq aýlasy bar. Sonyń 200-deıine sý kiripti. Oblys ákimi ánebir kúnderde bul aýylǵa tikushaqpen jetip, jaǵdaıyn bilgen. Qazir bul aýyldyń tirligi qalypty jaǵdaıǵa túsip keledi. Alaıda halyq «úlken jerge» áli de qaıyqpen shyǵýǵa májbúr. Bul, ásirese, Petropavlda qyzmet isteıtin jandarǵa qıyn. Sonyń biri – Natalıa Petrova. «Buryn jumysqa 30-40 mınýtta jetetin edik, qazir bir jarym saǵatta jetemiz. Qaıyqpen arǵy jaǵaǵa shyqqansha sonshalyq ýaqyt ketedi. Biraq kúnnen-kúnge sýdyń tartylyp kele jatqanyn kórip otyrmyz», deıdi ol.
Taǵy bir Alık Múrsálim esimdi turǵyn da óziniń kúnine qaıyqpen eki ret ótetinin aıtty. «Qutqarýshylarǵa rahmet, olar únemi janymyzda. Qaıyqtar tańǵy 08.00-den keshki 19.00-ge deıin tasıdy. Bir rezeńke qaıyq tórt adamdy alady, al temir qaıyq bes adamdy alady», deıdi ol.
TJD bastyǵynyń orynbasary Narıman Ashamev pantondy ótkel salǵanyn aıtty. Alaıda onymen adamdardy tasymaldaýǵa ruqsat etilmeıdi eken. Ol tek júk tasýǵa, sonyń ishinde malǵa jemshóp tasýǵa paıdalanylady. «Adamdardy ótkizgende barlyq qaýipsizdik talabyn oryndaımyz. Árbir jolaýshyǵa qutqarý jıleti beriledi. Sonymen birge qaıyqta ózderin qalaı ustaý keregin de aıtyp otyramyz. Keıde jastar qaıyqtyń shetine otyryp, onyń aýdarylyp ketý qaýpin týdyrady. Ásirese osyndaı adamdarǵa qaýipsizdik nusqamasyn bildirip otyrmasa bolmaıdy», deıdi N.Ashamaev.
Tasqynnyń kúshti bolǵan kúnderinde aqqan seńder aýylǵa tartylǵan elektr baǵandaryn qıratyp, jaryqsyz qaldyrǵan. Ol kúnderde generatorlar ákelip, aýyldyń jartysyna ǵana jaryq berilgen edi, qazir elektr baǵandary jóndelip, jaryq úzilissiz berilip tur.
Soltústik Qazaqstan oblysy
