Foto: freepik.com
Oqý-aǵartý mınıstrliginiń dereginshe, 1-10 synyp aralyǵyndaǵy oqýshylar sany 3,1 mln-nan asady. Sala olardyń 88%-yn belsendi jazǵy demalyspen qamtýdy josparlap otyr. О́ńirlerde balalardyń tizimi túgendelip, lagerlerdegi oryndar ázirlenip jatyr. Birinshi kezekte ondaǵy sanıtarlyq talaptardyń saqtalýyna mán berilmek. Jalpy, balalar úshin jyl boıy qyzmet etetin, maýsymdyq jáne mektep janyndaǵy lagerler jumys isteıdi.
Sonymen qatar bıyl aımaqtarda qanatqaqty rejimde birneshe jańa joba júzege asyrylmaq. Máselen, Qaraǵandy oblysynda IT-lager ashý josparlanyp otyr. О́ńir ákiminiń orynbasary Erlan Qusaıynnyń sózinshe, Temirtaýdaǵy joǵary polıtehnıkalyq kolledj bazasynda 100 bala demalystan bólek, IT mamandyqtyń qyr-syrymen tanyspaq. Aldaǵy ýaqytta bul tájirıbeni keńeıtý jaǵy da qarastyrylyp jatyr.
Al Shyǵys Qazaqstan oblysynda «Qonaqjaı otbasy» jobasy qolǵa alynǵan. Joba aıasynda 120 bala úshin Katon-Qaraǵaı, Glýbokoe aýdandary men Rıdder qalasynda tanymdyq is-sharalar uıymdastyrý kózdelgen.
«Balalar aýyldyq jerdegi otbasylarda ýaqytsha qonystanady. Ondaǵy ata-analardyń biri pedagog bolýy kerek. Sondaı-aq balalarǵa qajetti bólek bólmesi, sanıtarlyq talaptardyń saqtalýy jiti qadaǵalanady. Jobaǵa qatysatyn otbasylarǵa arnaıy aqy qarastyrylǵan. Otbasylyq lagerde balalarǵa aýyldyń turmysy, salt-dástúrimiz ben mádenı muralarymyz tanystyrylyp, tarıhı oryndar kórsetiledi», dedi oblys ákiminiń orynbasary Darhan Sapanov.
Ulttyq dástúrdi dáripteýdi Pavlodar oblysynda etnolagerler uıymdastyrý arqyly qolǵa alýdy maqsat etip otyr.
«О́ńirlerdegi úzdik tájirıbelerdi keńinen taratý jaǵyn qarastyrý kerek. Biz úshin eń mańyzdysy – lagerge baratyn balalardyń qaýipsizdigi. Sondyqtan múddeli memlekettik organdar men jergilikti ákimdikter bul iste birigip jumys isteýi kerek. Demalystan, saýyqtyrýdan bólek, balalardyń jan-jaqty damýyna qatysty sharalardyń mazmunyna basa mán bergen jón. Oqý-aǵartý mınıstrligi bul jumysty turaqty baqylaýynda ustaýy qajet. Ata-analarǵa usynylatyn jazǵy demalys túrleri boıynsha aqparattyq-nasıhat jumystaryn júrgizgen jón», dep atap ótti T.Dúısenova.
Aıta keteıik, eldegi sý tasqynyna baılanysty birqatar óńirdiń oqýshylary ýaqytsha oqý-saýyqtyrý ortalyqtary men balalar lagerlerine ornalastyryldy. Qazirgi tańda 651 balaǵa demalys oryndarynda turýǵa, tamaqtanýǵa, oqýǵa barlyq jaǵdaı jasalǵan.
