Infografıkany jasaǵan – Záýresh SMAǴUL ,«EQ»
Bul týraly óńirlik kommýnıkasııalar qyzmetiniń alańynda ótken brıfıngte oblystyq bilim basqarmasynyń basshysy Innesa Chernysheva habarlaǵan.
Bıyl jazda sapaly demalyspen jáne saýyqtyrýmen oblystaǵy 93 482 (99,9%) oqýshyny qamtý josparlanyp otyr. Onyń ishinde kópbalaly jáne az qamtylǵan otbasylardan shyqqan 4 850 bala bar.
Jazda oblysta 420 jazǵy lager jumys isteıtin bolady. Onyń 15-i – qala syrtyndaǵy lager, 270-i – mektep janyndaǵy lager, 135-i – beıindik alań.
– Balalardyń jazǵy demalysyn uıymdastyrýǵa oblystaǵy 819 tálimger, 670 qosymsha bilim pedagogi, 250 medısına qyzmetkeri, sondaı-aq kolledjder men ýnıversıtetterdiń stýdentteri jumyldyrylmaq. Kanıkýl kezinde 8 100 oqýshy qala syrtyndaǵy lagerlerde, 18 672 oqýshy mektep janyndaǵy lagerlerde demalady. 36 qosymsha bilim berý uıymynda 37 900 balaǵa arnalǵan kúndizgi lagerler, debat alańdary, shyǵarmashylyq stýdııalar, sport seksııalary uıymdastyrylady, – dedi Innesa Chernysheva.
Sonymen qatar jas natýralıster stansalarynda dalalyq ekologııalyq mektepter qyzmet etedi, olarda 750 bala erekshe qorǵalatyn tabıǵı aýmaqtardaǵy monıtorıngke qatysady.
Budan bólek, kovorkıng ortalyqtary, 27 aýlalyq klýb pen 3 500 oqýshyǵa arnalǵan úıirmeler jumys isteıdi.
Eń qyzyǵy, 24 560 oqýshy oblystaǵy ulttyq tabıǵı parkter men tarıhı-mádenı oryndarǵa saıahattaıdy. Atap aıtsaq, olar Katonqaraǵaı ulttyq tabıǵı parkin, Rıdderdegi Batys Altaı tabıǵı qoryǵyn, Qıyn-Kerish shatqalyn, Aqbaýyr arheologııalyq keshenin, Berel qorǵanyn, Ablaıkıt keshenin, Shemonaıhadaǵy Marıa jartasyn, Buqtyrma sý qoımasyn tamashalap, ekologııalyq týrızm jobalaryna, arheologııalyq mektepterge tartylady.
Sondaı-aq jetim jáne ata-analarynyń qamqorynsyz qalǵan 200 bala men týrıstik jarystardyń jeńimpazdary úshin Buqtyrma sý qoımasyna kememen bir kúndik serýender uıymdastyrylady.
Al «Jazdyq joldama» respýblıkalyq jobasy aıasynda 689 bala «Qazaqstan halqyna» qorynyń qarajaty esebinen «Daryn» lagerinde demalatyn bolady. Olar – aýyl mektepteriniń oqý ozattary jáne olımpıadalar men baıqaýlarda júlde alǵan oqýshylar.
Osy rette óńirdegi mektep oqýshylarynyń Almaty oblysyndaǵy «Bóbek» jáne «Baldáýren» ulttyq bilim berý jáne saýyqtyrý ortalyqtarynda jyl boıy tegin demalýǵa múmkindikteri bar ekenin aıta ketken jón. Bıyl ol ortalyqtarda Shyǵystyń 156 balasy demalǵan, jyl sońyna deıin taǵy 277 oqýshy barady.
Basa aıta keterligi, oblysymyzdyń biregeı jobasy – «Qonaqjaı otbasynyń» aýqymy keńeıedi. Endi oqýshylar qazaq tilin úırený maqsatynda Katonqaraǵaı aýdanynan bólek, Glýbokoe aýdany men Rıdder qalasyna da jiberiledi.
– Byltyr jazda «Qonaqjaı otbasy» jobasy alǵashqy ret júzege asqan bolatyn. Bıyl jobanyń aýqymy ulǵaıyp otyr. Qatarǵa Glýbokoe aýdany men Rıdder qalasy qosyldy. Osy joly 120 bala men 50 otbasy qatysady. Byltyr 65 oqýshy qamtylǵan, – dedi basqarma basshysy.
Bul joba balalardy qazaq tilin qarapaıym ádispen úıretýdi kózdeıdi. Iаǵnı oqýshylar qazaqshany tildik ortada júrip meńgeredi. Sonymen qatar balalar ólkemizdiń ótkenimen, ultymyzdyń salt-dástúrimen tanysyp, kıeli sanalatyn jerlerge, tarıhı-mádenı oryndarǵa barady.
Aıtqandaı, jazda Samar aýdanyndaǵy «Balaýsa» lageriniń negizinde 7-8 synyp oqýshylaryna arnalǵan áskerı-patrıottyq lager ashylady. Onda oqýshylar ádettegi is-sharalarmen qatar áskerı-taktıkalyq oıyndar men joryqtarǵa qatysyp, jaýyngerlermen kezdesedi.
Jalpy, balalardyń jazǵy demalysy barynsha qaýipsiz bolýy úshin ishki ister, sanıtarlyq-epıdemıologııalyq baqylaý organdary, tótenshe jaǵdaılar departamenti ókilderinen quralǵan jumys toby jasaqtalyp otyr.
Barlyq qala syrtyndaǵy lagerlerde sýmen qamtý nysandaryn dezınfeksııalaý, kenege qarsy is-sharalar júrgizý jumystary bastalyp ketti. Sý qoımalaryna jaqyn ornalasqan jáne júzý aýmaqtary bar jeti lagerde tótenshe jaǵdaılar departamentiniń mamandary shomylý oryndaryn belgilep, sý túbin tazalaıdy. Jazǵy lagerlerde tótenshe jaǵdaılardyń aldyn alý maqsatynda monıtorıng toptary, bilim basqarmasynda jáne barlyq bilim bólimderinde senim telefondary jumys istemek.
Shyǵys Qazaqstan oblysy
