Foto: azattyq-ruhy.kz
Poıyz áne-mine keledi dep taǵatsyzdana kútip turǵandardyń arasynda 85 jastaǵy Klara ájeı de bar. Ol nemeresi Daryn Jubathanovty qarsy alýǵa arnaıy kelgen.
– Balalarymyz Otan aldyndaǵy boryshyn adal atqaryp, ortamyzǵa aman-esen oraldy. Jas býynnyń barlyq oıǵa alǵan arman-maqsattary oryndalsyn. Elimizdiń bolashaǵy jastardyń qolynda! – dedi aqjaýlyqty áje.
О́mir mektebinen ótken jaýyngerler áskerdegi oqý-jattyǵýlardy, marshtar men dabyl arqyly kóterilgen kúnderin eshqashan umytpaq emes. Otan aldyndaǵy boryshyn ótegen zapastaǵy kishi serjant Álı Amangeldi osylaı deıdi.
– Armııada kez kelgen qıyn jaǵdaıda ıyq tirestire júrip, naǵyz dostyqtyń qanshalyqty mańyzdy ekenin túsinesiń. О́zim teńiz jaıaý áskerinde qyzmet etkenimdi maqtan etemin, – dedi ol.
Áskerde qyzmet etken jastarǵa UBT tapsyrmaı-aq eldiń joǵary oqý ornyna túsý quqyǵy berilgen. Al jaýyngerlik jáne memlekettik-quqyqtyq daıyndyqta úzdik nátıje kórsetkender tegin negizde joǵary bilim ala alady.
– Jerlesterimizdi saltanatty jaǵdaıda áskerge shyǵaryp salyp, qurmetpen qarsy alý dástúrge aınaldy. Azamattyq boryshyn ótegen 20-dan astam áskerı qyzmetshi úılerine aman-esen oraldy, – dedi Atyraý oblysynyń Qorǵanys isteri jónindegi departamenti basshysynyń orynbasary, polkovnık Qýandyq Berdiǵalıev.
Semeılikter de Mańǵystaý poıyzyn saltanatty jaǵdaıda qarsy aldy. Is-sharaǵa Abaı oblysynyń Qorǵanys isteri jónindegi departamentiniń ókilderi, sarbazdardyń ata-analary men dostary qatysty.
– Osydan týra bir jyl buryn bul jigitterdi áskerge shyǵaryp salǵan edik. Olar naǵyz er jigitteı shyńdalyp ortamyzǵa qaıta oralyp otyr. Áskerden alǵan tájirıbesi men bilimderi aldaǵy ómirlerine negiz bolatynyna senimdimin, – dep atap ótti Abaı oblysynyń Qorǵanys isteri jónindegi departamenti basshysynyń tárbıe jáne ıdeologııalyq jumystar jónindegi orynbasary, podpolkovnık Qanat Sháriphanov.
