Alǵashqy at basyn burǵan nysan Shymkent saýda-logıstıkalyq ortalyǵy. Bul jerdegi 5 gektar aýmaqta «NMI-Iýg» JShS-nyń kópsalaly qoıma kesheni salynyp jatyr. Atalǵan jobanyń quny – 10,2 mlrd teńgeni quraıdy. Qurylystyń birinshi kezeńin bıyl aıaqtaý josparlanyp otyr. Búgingi tańda birinshi kezeńniń qurylys-montajdaý jumystary bitýge taıaý. Qoıma úı-jaılarynyń jalpy aýdany – 22 myń sharshy metr. Seriktestik quryltaıshysy Aıjan Naımbekova salynyp jatqan nysan klımattyq baqylaýdyń ıkemdi júıesi, tońazytqysh kameralarynyń temperatýrasyn -18-den + 4 gradýsqa deıin retteý múmkindigi bar A + sanatyndaǵy qoıma bolatynyn aıtady. Jáne zamanaýı qoımada taýarlardyń keń assortımentin saqtaýǵa múmkindik týady.
Vıse-premer issapar aıasynda «Alsera kz» JShS-nyń jylyjaı kesheni jobasymen tanysty. 650 mln dollarǵa baǵalanǵan ınvestısııalyq jobany «Bozaryq» ındýstrııalyq aımaǵynda júzege asyrýshy «Alarko Holding» sheteldik túrik kompanııasy. Investor jańa tehnologııalardy qoldana otyryp, 500 gektar alańda birneshe kezeń aralyǵynda jylyjaı qurylysyn júrgizedi. Zamanaýı jylyjaı kesheninde qııar, qyzanaq, baqsha daqyldary men basqa da aýyl sharýashylyǵy ónimderi ósiriledi. Keleshekte bul nysan Shymkenttegi jabyq keshende kókónis óndiretin eń úlken jylyjaı atanbaq, sondaı-aq osy jobanyń aıasynda eki myńǵa jýyq jańa jumys oryndary ashylady.
Úkimet basshysynyń orynbasaryna qala ákimi Ǵabıt Syzdyqbekov saýda-logıstıkalyq ortalyǵynda iske asyrylatyn basqa da jobalar týraly baıandady. О́z kezeginde S.Jumanǵarın atalǵan jobalardyń keleshegi men perspektıvalaryn joǵary baǵalap, memleket tarapynan barlyq qajetti qoldaýlar kórsetiletinin málimdedi. Vıse-premerdiń aıtýynsha agroónárkásiptik keshender boıynsha memleket ustanǵan saıasat – aýyl sharýashylyǵy ónimderin tereń óńdeý kólemin 70% jetkizý bolsa, saýda-logıstıkalyq ortalyǵyndaǵy jańa jobalar sol nátıjege jetýge múmkindik beredi.
«AZALA Textile» JShS Qazaqstandaǵy daıyn toqyma ónimderin óńdep shyǵaratyn, jabyq sıkldi jalǵyz iri toqyma fabrıkasy sanalady. Osy oraıda vıse-premer atalǵan kásiporyn jumysymen jaqynyraq tanysty. Búgingi tańda fabrıkada 475 adam jumys isteıdi. Biregeı toqyma kombınaty ıirilgen jipten ártúrli daıyn toqyma buıymdaryn shyǵarady. Kásiporynnyń jyldyq qýattylyǵy 6 800 tonnadan astam ıirilgen jip pen 14 mln syzyqtyq metrli aýyr matalar óndirýge qaýqarly. Toqyma fabrıkasynyń ónimderi negizinen eksportqa baǵyttalǵan. Iаǵnı «AZALA Textile» óndirgen taýarynyń shamamen 70% taıaý shet elderge, Lıtva, Germanııa, Italııa, Polsha, Belgııa, Danııa, Latvııa men Túrkııaǵa jóneltedi. О́ndiristik sehtardy aralap, zaýyt basshylyǵymen emen-jarqyn áńgimelesken Úkimet basshysynyń orynbasary issaparynyń qorytyndysynda otandyq toqyma óndirýshisiniń ónimine memlekettik satyp alýdy ulǵaıtý múmkindigi úkimettik deńgeıde pysyqtalatynyn jetkizdi.
ShYMKENT
