Foto: kazaknews.kz
Testileýdiń ózi 16 mamyrda bastalyp, 5 shildege deıin jalǵasady. Alaıda tótenshe jaǵdaı rejımi jarııalanǵan 6 óńir: Aqmola, Aqtóbe, Atyraý, Batys Qazaqstan, Qostanaı, Soltústik Qazaqstan oblystarynyń mektep bitirýshileri úshin tirkelý ýaqyty 6-20 mamyr aralyǵyna deıin uzartylady. Olar 25 mamyr men 12 shilde aralyǵynda test tapsyrý qajet.
Ǵylym jáne joǵary bilim mınıstrliginiń sheshimi boıynsha 2024 jyly talapkerler negizgi UBT-ny eki ret tapsyryp, eń úzdik nátıjemen grant konkýrsyna qatysa alady.
Túlekter UBT-ǵa qatysý úshin Ulttyq testileý ortalyǵynyń app.testcenter.kz saıty nemese UTO qosymshasy arqyly tirkeledi. Talapkerler testileý kúnin, ýaqytyn jáne pýnktin ózderi tańdaıdy. Bul rette olar eki múmkindik úshin beıindik pánderdiń bir ǵana kombınasııasyn belgileıdi.
«Oqý jylynyń basynda UTO saıtynda test tapsyrmalary qurastyrylǵan oqýlyqtar tizimi men test jospary; «Qazaqstan tarıhy» jáne «Dúnıejúzi tarıhy» pánderi boıynsha 100 tarıhı data tizimi; «Informatıka» páninen termınder tizimi; «Qazaq ádebıeti» jáne «Orys ádebıeti» boıynsha ádebı shyǵarmalar tizimi jarııalandy.
Testileý formatynda ózgerister joq. 2024 jylǵy talapkerler úsh mindetti jáne tańdaý boıynsha eki pánnen test tapsyrady. «Oqý saýattylyǵy» men «Matematıkalyq saýattylyq» mindetti pánderinen tapsyrmalar sany 5 suraqqa qysqardy. Bul beıindik pánder boıynsha suraqtar sanyn 40-qa deıin arttyrýǵa múmkindik berdi. Sonymen qatar beıindik pánderde berilgen tizimnen sáıkestikti anyqtaýǵa arnalǵan 5 tapsyrma qosyldy.
Osylaısha, UBT tapsyrmalar sany ózgerissiz qalady, jalpy 120 suraq. Onyń ishinde «Qazaqstan tarıhynan» 20 tapsyrma, «Oqý saýattylyǵynan» 10 tapsyrma, «Matematıkalyq saýattylyqtan» 10 tapsyrma jáne eki beıindik pán boıynsha 40 tapsyrma. Joǵary ball – 140, ol da ózgerissiz qaldy», delingen Ulttyq testileý ortalyǵynyń habarlamasynda.
Testileýdiń jalpy ýaqyty – 4 saǵat (240 mınýt). Sonymen qatar erekshe bilim berý qajettilikteri bar balalarǵa qosymsha 40 mınýt ýaqyt beriledi.
