Sýretterdi túsirgen – Erlan OMAR, «EQ»
«Sáýir bolmaı, táýir bolmas» degen. Kókek aıynda aýyldaǵy aǵaıyn qural-saımanyn túgendep, eńbekke qamdanady. Osy mezgilde qala turǵyndary da senbilikke shyǵyp, qalany kúl-qoqystan tazartýǵa, kóshet otyrǵyzýǵa kirisedi. Bul joly qalamen qatar aýyl turǵyndary da tazalyq aksııasynan qalys qalmaýǵa tyrysty. Bes aptaǵa jalǵasqan ekologııalyq naýqannyń ár aptasy belgili bir taqyrypqa arnaldy. Osy oraıda Astanada «Taza Qazaqstan. Astana – tazalyq pen tártiptiń úlgisi» degen ataýmen jalǵasqan aksııaǵa jýrnalıster de judyryqtaı jumylyp, qoldaý kórsetti. Senbilikte L.N.Gýmılev atyndaǵy Eýrazııa ulttyq ýnıversıteti Jýrnalıstıka jáne saıasattaný fakýltetiniń stýdentteri «Qazaq gazetteri» seriktestigine qarasty «Egemen Qazaqstan» gazetiniń ujymymen birge «Jýrnalıster saıabaǵyn» tazalady. Jýrnalıstıka jáne saıasattaný fakýltetiniń oqytýshylary jáne stýdentterimen birge kelgen fakýltet dekany Qaırat Saq redaksııamen áriptestik baılanys úzilmeıtinin aıtty.
«Búgin «Taza Qazaqstan» respýblıkalyq aksııasy aıasynda Jýrnalıstıka jáne saıasattaný fakýlteti men «Qazaq gazetteri» JShS ujymynyń arasynda baılanys berik ekenin taǵy bir kórsetip, «Jýrnalıster saıabaǵyna» ujymdastarmen, stýdenttermen keldik. Bıyl Jýrnalıstıka jáne saıasattaný fakýltetiniń qurylǵanyna – 14 jyl. Bir jaǵy fakýltetke ózimizshe osylaı tartý jasaýdy uıǵardyq. «Jýrnalıster saıabaǵy – fakýltettiń, ujymnyń da saıabaǵy. Senbilikke kelýge nıet bildirgen stýdentterdiń kóbi buryn-sońdy saıabaqqa kelmepti. Sáıkesinshe olar «Jýrnalıster saıabaǵyna» barý týraly usynysty birden qýattady», dedi Q.Saq.
Senbilikke kelgen stýdentterdiń arasynda Jýrnalıstıka jáne saıasattaný fakýltetiniń 3-kýrs stýdenti Nuraılym Amangeldiqyzy bar. Ol Baspasóz jáne baspa isi kafedrasyndy oqıdy.
«Toptaǵy stýdentterdiń «Jýrnalıster saıabaǵyna» senbilikke baramyz degen uıǵarymyn birden quptadym. Bir jaǵy alleıany tamashalap, ekinshiden, «Egemen Qazaqstan» gazetiniń mekenjaıyn bilgim keldi. Baspasóz jáne baspa isi kafedrasynda bilim alyp jatqan soń, gazettiń tarıhynan habardarmyz. Búgin basylymda eńbek etetin birneshe aǵa býynmen júzdestik. Keleshekte osy basylymda eńbek etýdi qalaıtyn qatarlastarym kóp. Men de solardyń qataryndamyn», dedi N.Amangeldiqyzy.
Senbilikten keıin ýnıversıtet pen basylym ujymy estelik sýretke túsip, jyly lebiz, yqylas-nıet bildirip tarqasty.
Osy kúni máslıhat depýtattary Baıqońyr aýdany ómirlik jaǵdaıy qıyn balalardy qoldaý ortalyǵynyń tóńiregin tazalady. Qonaqtardy dırektordyń mindetin atqaryp júrgen maman Aıagóz Nábıeva qarsy alyp, mekemeniń jumysy týraly az-kem aqparat berdi.
«Bizge zorlyq-zombylyq kórgen balalar, devıantty minez-qulqy bar balalar da keledi. Búginde ortalyqta 70 bala tirkelgen, onyń 44-i – turaqty, 36-sy – ýaqytsha turatyndar. Búgingi senbilikke qalalyq máslıhattyń depýtattary kelip, balalarmen birge kóshet otyrǵyzdy. Mekemeniń aýlasyn tazalaýǵa járdemdesti. Qalalyq máslıhattyń, bizdiń bastamamyzben iske asyp jatqan budan ózge de is-sharalar kóp», dedi A.Nábıeva.
Ekologııalyq aksııada elorda turǵyndary «Nurly júrek» áleýmettik qyzmet kórsetý ortalyǵynyń aýmaǵyna aǵash otyrǵyzdy. Bul is-sharaǵa atalǵan mekemeniń, Almaty aýdany ákimdiginiń qyzmetkerleri, «Jas sarbaz» qozǵalysynyń tárbıelenýshileri, jastar uıymynyń ókilderi, qoǵam qaıratkerleri men eriktiler jıyldy. Osy tusta «Nurly júrek» áleýmettik qyzmet kórsetý ortalyǵynyń dırektory Nurbol Zulqarnaev qala turǵyndaryn ekologııalyq aksııadan qur qalmaýǵa shaqyrdy.
«Árbir azamat qalanyń kórkeıýine úles qosýǵa mindetti dep bilemiz. Búgin «Taza Qazaqstan» aksııasy aıasynda «Nurly júrek» ortalyǵynyń aýmaǵynda 40 alma aǵashy otyrǵyzyldy. Bizdiń ortalyqta 271 bala arnaıy áleýmettik qyzmet alady. Endi keleshekte olardyń óz alma baǵy bolady dep úmittenemiz. Biz ár beısenbide qosymsha ekoaksııa ótkizip, aýmaqty tazalaımyz. Árqaısymyzda azamattyq sana bolýy kerek. Tazalyq saqtap, qalany retke keltirýimiz qajet», dedi N.Zulqarnaev.
«О́negeli urpaq» dep atalatyn aptalyqta qala turǵyndary ardagerlerdiń, qarttar úıiniń aýmaǵyn abattandyrýǵa járdemdesti. Mysaly, Jastar saıasaty máseleleri basqarmasynyń mamany Álibek Júsipov bastaǵan jastar ekoapta aıasynda 4 mekteptiń aýlasymen qatar áleýmettik qyzmet kórsetý ortalyǵynda aǵash otyrǵyzǵan. Osy aptalyqta Dene shynyqtyrý jáne sport basqarmasynyń basshysy Vasılıı Levıt, elge tanymal kásipqoı boksshy, Rıo Olımpıadasynyń chempıony Danııar Eleýsinov, aýyr atletıkadan álem chempıony Edige Emberdi tóbe kórsetti. Belgili sportshylar Astana mańyndaǵy «Svetoch» balalar úıiniń janyndaǵy orta mektepte senbilik uıymdastyrdy.
«Taza Qazaqstan» dep atalatyn aýqymdy ekologııalyq aksııanyń tórtinshi aptasy «О́negeli urpaq» uranymen ótip jatyr. Elorda turǵyndary ardagerlerdiń, balalar men qarttar úıiniń aýlalaryn tazalap, abattandyrdy. Ekologııalyq aksııaǵa biz de óz úlesimizdi qosýǵa tyrysyp jatyrmyz. Áriptestermen aqyldasa kele, Astana mańynda ornalasqan «Svetoch» balalar úıine keldik. Bul balalar úıinde qazir 19 bala tárbıelenedi eken», dedi V.Levıt.
«Tazalyq taza jerde emes, tazalyq saqtaǵan jerde bolady» degen. Bir emes, birneshe aptaǵa jalǵasqan senbilikterdiń basty maqsat-muraty da turǵyndardy tazalyq saqtaýǵa shaqyrý bolǵany belgili.
