Foto: Astana ákimdigi
Bul apta «Móldir bulaq» dep atalady, onyń barysynda sý aıdyndary – ózender men kólderdiń aınalasy qoqystan tazartylady. Ekoaksııa aıasynda Indýstrıaldy park kásiporyndarynyń 300-den astam qyzmetkeri Investısııalar jáne damý basqarmasymen birlesip, Astana qalasynyń kásiporyndarymen birge Aqbulaq arnasyn qoqystan tazartty.
Ekoaksııa Aqbulaq ózeniniń boıynda júrgizildi. Aqbulaq – elorda turǵyndary demalatyn jáne sportpen shuǵyldanatyn oryndardyń biri.
«Keńese kele dál osy oryndy tańdadyq. Týystarymyzben serýen quratyn sý arnasynyń aınalasy taza bolǵanyn qalaımyz. Búgin ekoaksııaǵa túrli kásiporyndardaǵy áriptesterim qatysyp jatyr jáne tańerteńnen bastap biz Aqbulaq arnasynyń aýmaǵyn qoqystan tazalap jatyrmyz», dedi kásiporyn qyzmetkeri Asyl Ryspaev.
Onyń aıtýynsha, mundaı ekoaksııalar turaqty negizde júrgiziledi. Ekoaksııaǵa qatysýshylar sanaýly saǵatta ózenniń aınalasyn tazalap, birneshe qap qoqys jınap, tazalyqqa úles qosty.
Esterińizge sala keteıik, ekoaksııa bastalǵannan beri kásipkerlik nysandardyń 5 myńnan astam ókili – kásiporyndar, shaǵyn jáne orta bıznes sýbektileri, saýda ortalyqtary, salondar, kafeler, dúkender, basqa da jeke kompanııalar men uıymdar óz obektilerine irgeles aýmaqtarda tazalyq ornatty.
Sonymen qatar ákimdik elordalyq kásipkerler úshin jyl boıy tazalyq pen tártipti saqtaý boıynsha usynystary bar chek-paraqtar ázirledi. Usynystar jyl mezgilderiniń erekshelikterin eskere otyryp ózgeredi. Sondyqtan olar tórt formatqa bólinedi: kóktem, jaz, kúz jáne qys.
